Ստեփանակերտի «Արևիկ» մանկական բուժմիավորման և ՀՀ «Արաբկիր» բժշկական համալիրի միջև այսօր ստորագրվել է համագործակցության համաձայնագիր:
«Արևիկ» մանկական բուժմիավորման և «Արաբկիր» բժշկական համալիրի միջև համագործակցության համաձայնագիր է ստորագրվել
ՍՏԵՓԱՆԱԿԵՐՏ, փետրվարի 23, ԱՐՑԱԽՊՐԵՍ։ Հուշագիրը ստորագրել են «Արաբկիր» բժշկական համալիրի երեխաների և դեռահասների առողջության ինստիտուտի տնօրեն Արման Բաբլոյանը և «Արևիկ» մանկական բուժմիավորման տնօրեն Մհեր Մուսայելյանը:
«Արցախպրես»-ի թղթակցի հաղորդմամբ՝ միջոցառմանն ԱՀ առողջապահության նախարար Կարինե Աթայանը, ողջունելով ներկաներին, ասել է, որ իրենց նախարարության կողմից ՀՀ «Արաբկիր» բժշկական համալիրի պատասխանատուների հետ ըստ նախապես ձեռք բերված համաձայնության «Արևիկ» մանկական բուժմիավորումն ստացել է հեռաբժշկության սարք, որն անչափ կարևոր ու անհրաժեշտ է Արցախի բժշկության համար:
Արման Բաբլոյանը, խոսելով համաձայնագրի կարևորության, ինչպես նաև հեռահար բժշկության մասին, մասնավորապես ասել է. «Երկու բուժհաստատությունների միջև ստորագրելով այս համաձայնագիրը սկիզբ ենք դնում համագործակցության նոր գործընթացի՝ հեռահար բժշկության կիրառման: Այն մի համակարգ է, որի ժամանակ խնդրահարույց բժշկական տարբեր հարցեր կարելի է համատեղ քննարկել և իրականացնել: Այս համակարգը «Արաբկիր» բժշկական համալիրում ներ է դրվել 8 տարի առաջ: Մենք համագործակցում ենք նաև ԱՄՆ-ի Նյու Ջերսի նահանգի համալսարանական հիվանադանոցի հետ: Նրանց միջոցով էլ մենք հնարավորություն ունենք կապվելու աշխարհի ցանկացած բուժմիավորումների հետ: Հեռահար բժշկության սարքի արժեքը կազմում է շուրջ 35 հազար ԱՄՆ դոլար»:
«Արևիկ» մանկական բուժմիավորման տնօրեն Մհեր Մուսայելյանը,
շնորհակալություն հայտնելով «Արաբկիր» բժշկական համալիրին նման աջակցության համար, կարևորել է սարքի ներդնումն իրենց հիվանդանոցում:
«Մենք այս սարքի միջոցով կկարողանանք հայաստանյան մեր գործընկերների հետ կապ հաստատելով՝
համատեղ ճիշտ բուժում իրականացնել»,-նշել է Մ. Մուսայելյանը:
Այնուհետև ՀՀ ԱՆ գլխավոր մանկական ուռուցքաբան, ուռուցքաբանության ազգային կենտրոնի մանկական ուռուցքաբանության և քիմիաթերապիայի բաժանմունքի վարիչ, պրոֆեսոր Գրգոր Բադալյանը «Արևիկ» բուժմիավորման բժիշկների առաջ հանդես է եկել «Ժամանակակից վաղ հայտնաբերման հնարավորություններն ուռուցքային հիվանդությունների ժամանակ» թեմայով դասախոսությամբ՝ օգտագործելով հեռաբժշկության սարքը:
