Այսօր՝ ապրիլի 24-ին՝ Ցեղասպանության 103-րդ տարելիցի առթիվ, Ստեփանակերտում Հայոց ցեղասպանության անմեղ զոհերի հիշատակին կառուցված Զանգակատուն-հուշակոթող են այցելել հարյուրավոր մարդիկ` իրենց հարգանքի տուրքը մատուցելու` Օսմանյան Թուրքիայի կողմից իրականացված ոճրագործության անմեղ զոհերի հիշատակին:
Ցեղասպանության զոհերի հիշատակին նվիրված՝ Արցախում ոգեկոչման միջոցառումներ են անցկացվում (լուսանկարներ)
ՍՏԵՓԱՆԱԿԵՐՏ, ապրիլի 24, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Զանգակատուն-հուշակոթող են այցելել նաև ԱՀ Ազգային Ժողովի նախագահ Աշոտ Ղուլյանը, պետնախարար Արայիկ Հարությունյանը, ԱՀ նախագահի աշխատակազմի ղեկավար Մարատ Մուսայելյանը, ԱԺ պատգամավորներ, պետական այրեր,ստեփանակերտցիներ, հյուրեր. նրանք ծաղիկներ ու ծաղկեպսակներ են խոնարհել Հայոց ցեղասպանության զոհերի հիշատակին: Դպրոցականները ձեռքներում պահած ունեին ցուցապաստառներ՝ Եղեռնը դատապարտող կարգախոսներով:
Ոգեկոչման արարողությանն Արցախի թեմի առաջնորդ Պարգև արքեպիսկոպոս Մարտիրոսյանի հանդիսապետությամբ տեղի է ունեցել ոգեկոչման կարգ:
Խոսելով Ցեղասպանության մասին՝ նա նշել է, որ 1988 թվականի համազգային շարժումը նպաստել է, որ հայ ժողովուրդը ձեռք բերի պետականություն՝ իր բոլոր կառույցներով՝ դրանով իսկ կասեցնելով Ադրբեջանի կողմից նոր Ցեղասպանությունների իրականացումը:
«Տա Աստված, որ այսուհետ աշխարհի ոչ մի անկյունում ոչ մի ժողովուրդ Ցեղասպանության չենթարկվի»,-մասնավորապես նշել է Պարգև արքեպիսկոպոս Մարտիրոսյանը:
Տեղեկացնենք, որ այսօր Արցախի բոլոր շրջաններում Մեծ եղեռնի զոհերի հիշատակին նվիրված հիշատակի և ոգեկոչման միջոցառումներ են անցկացվում:
