Երևանի Մեսրոպ Մաշտոցի անվան Մատենադարանի մասնաճյուղ «Մատենադարան-Գանձասար» գիտամշակութային կենտրոնը 2016 թվականին ունեցել է 11 հազար այցելու, իսկ 2017-ին՝ ավելի քան 14000:
«Մատենադարան-Գանձասար» գիտամշակութային կենտրոնը ինչո՞վ է գրավում զբոսաշրջիկներին. պարզաբանում է Վահան Տեր-Ղևոնդյանը
ՍՏԵՓԱՆԱԿԵՐՏ, ապրիլի 25, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Երևանի Մեսրոպ Մաշտոցի անվան Մատենադարանի տնօրեն Վահան Տեր-Ղևոնդյանը:
Նա նշել է, որ այցելուների մեջ մեծ թիվ են կազմում արտասահմանից ժամանած զբոսաշրջիկներ, դպրոցականներ, Արցախի տարբեր բնակավայրերի քաղաքացիներ. ԱՀ Պաշտպանության բանակի հետ համագործակցության շրջանակներում պարբերաբար գիտամշակութային կենտրոն են այցելում նաև զինծառայողներ:
Ըստ տնօրենի՝ մեծ թվով այցելուներ ունենալու առումով «Մատենադարան-Գանձասար» գիտամշակութային կենտրոնը կայացել է, սակայն դեռ անելիքներ ունեն գիտահետազոտական ուղղությունը ընդարձակելու,գրադարան-ընթերցասրահը համալրելու, տեխնիկական սարքավորումներ ավելացնելու,կահավորելու առումներով:
Անդրադառնալով այն հարցին, թե կենտրոնը զբոսաշրջիկներին ինչով է գրավում Երևանի Մատենադարանի տնօրենն ասել է, որ նախ՝ ցուցադրության ներկայացված պահպանված հայկական ձեռագրերի մշակույթով, երկրորդ՝ ներկայացված ձեռագրերի բացառիկությամբ, հնատիպ գրքերով՝ հրատարակված Արցախում:
Վ. Տեր-Ղևոնդյանն ասել է նաև, որ զբոսաշրջության զարգացման համար, «Մատենադարան-Գանձասար» գիտամշակութային կենտրոնն առաջիկայում անպայման ընդգրկված կլինի Արցախի զբոսաշրջային երթուղիների ցանկում. առանձին տուրիստական ընկերությունների հետ ևս աշխատանքներ կիրականացվեն:
Խոսելով «Մատենադարան-Գանձասար» գիտամշակութային կենտրոնում առաջիկայում նախատեսվող միջոցառումների մասին՝ Վ. Տեր-Ղևոնդյանն ասել է, որ մշտական ցուցադրություններից բացի նախատեսվում է նաև ժամանակավոր տարբեր ցուցադրություններ ևս, հայակական ձեռագրերի պատմությանը, դրանց վերականգնմանը և հայկական եկեղեցիներին վերաբերող տեսաֆիլմերի ցուցադրում. վերջիններս ուսուցողական նպատակներ են հետապնդելու:
«Այս կենտրոնում պետք է պարբերաբար միջոցառումներ անցկացնենք՝ կազմակերպելով տարբեր թեմաներով գիտաժողովներ, գրքերի շնորհանդեսներ, նոր ցուցադրություններ և այլն: Կենտրոնը պետք է դառնա մտավորականության, գիտնականների, ուսանողության և երիտասարդության սիրելի գիտական հավաքատեղի: Նշեմ, որ Արցախը ներկայացնելու առումով կենտրոնն ունի քաղաքական մեծ առաքելություն ոչ թե որպես ռազմականացված գոտի, այլ երկիր, որտեղ որպես խաղաղասեր ժողովուրդ ապրում, ստեղծագործում, զարգացնում են հայկական մշակույթն ու գիտական միտքը՝ հենված մեր նախնիների դարավոր ավանդույթներին»,-ասել է Վ. Տեր-Ղևոնդյանը:
Արցախի պատմամշակութային հուշարձանների վերաբերյալ Մատենադարանի կողմից գրքեր հրատարակելու մասին մեր հարցին ի պատասխան տնօրենը նշել է, որ եթե նույնիսկ անմիջական Մատենադարանը չի հրատարակում, ապա իրենց գիտաշխատողները նման գրքերի տպագրության գործին ակտիվ մասնակցություն են ունենում: Որպես օրինակ նա բերել է վերջերս տպագրված «Դադիվանք. վերածնված հրաշալիք» եռալեզու գիրքը, ընդծելով իրենց գիտաշխատողի՝ Կարեն Մաթևոսյանի անունը:
Մեր զրուցակիցը նշել է, որ «Մատենադարան-Գանձասար» գիտամշակութային կենտրոնը ձեռագրերով համալրելու խնդիրն անկասկած իրենց ուշադրության կենտրոնում է և ավելացրել. ««Մատենադարան-Գանձասար» գիտամշակութային կենտրոնում չկան ձեռագրերի բնօրինակներ. մշտական ցուցադրության է դրված հիմնականում ձեռագրերի պատճեններ, որոնք աշխարհի տարբեր թանգարաններում էլ կան: Պատճառը ցուցադրության անհրաժեշտ պայմաններ չունենալն է, այլ ոչ թե այցելուներին խաբելը»:
Մեր այն հարցին, թե Երևանի Մատենադարանի ձեռագրերի բնօրինակները չեն նախատեսում ցուցադրել «Մատենադարան-Գանձասար» գիտամշակութային կենտրոնում ևս՝ Վ. Տեր-Ղևոնդյանը պատասխանել է, որ իրենք ամբողջությամբ չեն կարող տեղում ստեղծել անհրաժեշտ բոլոր պայմանները,որ ձեռագրերի բնօրինակները «Մատենադարան-Գանձասար»-ում մշտական ցուցադրության դրվի, բայց որևէ առիթ լինելու դեպքում կարող են որոշ բնօրինակներ ժամանակավոր ցուցադրել տեղի կենտրոնում:
Մեր զրուցակիցը տեղեկացրել է նաև, որ «Մատենադարան-Գանձասար» գիտամշակութային կենտրոնի ձեռագրերի շուրջ 25%-ն արդեն թվայնացվել է. այդ գործընթացը շարունակվում է:
