ՍՏԵՓԱՆԱԿԵՐՏ, հունիսի 6, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ հունիսի 6-ին կայացած մամլո ասուլիսի ժամանակ հայտարարել է ԱՀ պետական նախարար Արայիկ Հարությունյանը՝ մանրամասնելով, որ վերջին մի քանի ամիսներին՝ մանավանդ հայաստանյան վերջին իրադարձություններից հետո, Արցախի ժողովրդի մոտ ևս ձևավորվեց փոփոխություններ կատարելու պահանջ:

«Ացախում ժողովրդավարական արժեքների զարգացման առումով արձանագրվել է լուրջ առաջընթաց, սակայն վերջին օրերի իրադարձությունները բերեցին նրան, որ պահանջն Արցախում ընդգծվել է, և իշխանությունը պարտավոր է հաշվի առնել դա: Վերջին մեկ ամսվա ընթացքում ԱՀ Նախագահի հետ քննարկում էինք՝ ինչպիսի բարեփոխումներ իրականացնել, որը թույլ է տալու առաջին հերթին վստահություն ներշնչել հանրության շրջանակում, իրականացնել ճիշտ բարեփոխումներ: Տնտեսության զարգացման առումով միշտ էլ անհրաժեշտ են լինում փոփոխություններ, սակայն այն հիմքը, որը դրվել է ավելի քան 10 տարի առաջ, և երկրում ապահովել է տարեկան միջինը 10 տոկոսից ՀՆԱ-ի աճ, երկրին բերել է քաղաքաշինության, սոցիալական, տնտեսական առումներով լուրջ զարգացում, սակայն, այն բավարար չէ հանրության այսօրվա տրամադրությունների առումով»,- ասել է Ա. Հարությունյանը:

Պետական նախարարն անդրադարձել է նաև իր կողմից ղեկավարվող քաղաքական ուժին՝ «Ազատ հայրենիք» կուսակցության, որը Խորհրդարանում ունի ամենամեծ խմբակցությունը՝ ընդգծելով, որ այն պետք է ավելի մեծ դերակատարություն ունենա բարեփոխումների ընթացքում, կապող օղակ հանդիսանա իշխանությունների և հասարակության միջև՝ իրականացնելով ավելի ակտիվ աշխատանք:

«Ղեկավարելով «Ազատ հայրենիք» կուսակցությունը՝ նպաստելու ենք Նախագահի կողմից իրականացվող բարեփոխումներին և, լինելով անմիջական շփման հետ հանրության մեջ, դրանով իսկ նպաստելու ենք առաջ քաշված խնդիրների ավելի արագ կարգավորմանը: Կուսակցությունը պատրաստվում է ակտիվ մասնակցել Արցախում առաջիկայում կայանալիք ընտրություններին»,- եզրափակել է Ա. Հարությունյանը:

Պետական նախարարը պատասխանել է նաև լրագրողների կողմից հնչեցված մի շարք հարցերի: