Այսօր` հուլիսի 27-ին, Սյունիքի մարզի Գորիսի համայնքապետարանում Արցախի Հանրապետության պետական նախարար Գրիգորի Մարտիրոսյանի գլխավորած պատվիրակությունը մասնակցել է «ՀՀ վարչատարածքային բարեփոխումներ․ ձեռքբերումներ և անելիքներ» թեմայով շնորհանդես-քննարկմանը:
Պետնախարարի գլխավորած պատվիրակությունը Գորիսում մասնակցել է ՏԻՄ նոր մոդելի շնորհանդես-քննարկմանը
ՍՏԵՓԱՆԱԿԵՐՏ, հուլիսի 27, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` շնորհանդես-քննարկումը կազմակերպվել է ՀՀ տարածքային կառավարման և զարգացման նախարար (ՏԿԶ) Սուրեն Պապիկյանի նախաձեռնությամբ, ով եռօրյա այցով գտնվում է Սյունիքի մարզում:
Ողջունելով ներկաներին` ՀՀ ՏԿԶ նախարար Սուրեն Պապիկյանն ասել է, որ վերջին շրջանում Արցախ կատարած պաշտոնական այցի ընթացքում պայմանավորվածություն էր ձեռք բերվել ԱՀ պետական նախարարի և գյուղատնտեսության նախարարի հետ աշխատանքային քննարկում կազմակերպել ՀՀ խոշորացված համայնքներից որևէ մեկում:
«Ե’վ Հայաստանի, և’ Արցախի Հանրապետությունները գտնվում են վարչատարածքային բարեփոխումների կարևոր փուլում, և այն կարծես թե համընկել է Սահմանադրությունների փոփոխությամբ ու նոր կառավարման համակարգի ներդրմամբ: Բարեփոխումները միտված են տարածքային կառավարման եռաստիճան համակարգից երկաստիճան համակարգի անցմանը: Արցախն այս փուլում հնարավորություն ունի Հայաստանի հաջող փորձը տեսնելուց հետո այն կիրառել նաև իր տարածքում: Այդ շրջափուլից առաջ մենք կարևորեցինք այսօրվա հանդիպումը: Խոշորացման գործընթացը Հայաստանում տեղի չի ունեցել սահուն ձևով: Կան իհարկե թերություններ, սակայն ունենք նաև կարևոր ձեռքբերումներ: Սա կօգնի ԱՀ գործընկերներին` բարեփոխումների փուլում զերծ մնալու այն սխալներից, որոնք եղել են ՀՀ-ում: Խոշորացումը պետք է լինի հանրության համաձայնության արդյունքում: Միջազգային փորձը ցույց է տալիս, որ այն արդյունավետ գործընթաց է, քանի որ տնտեսվում են հսկայական ֆինանսական միջոցներ, որոնք հնարավոր են օգտագործել համայնքների տնտեսական ենթակառուցվածքների զարգացման համար»,- մանրամասնել է Ս. Պապիկյանը:
Իր հերթին ԱՀ պետական նախարար Գրիգորի Մարտիրոսյանը շնորհակալություն է հայտնել նախարար Սուրեն Պապիկյանին արցախյան կողմի խնդրանքին արձագանքելու և համայնքների խոշորացման հայաստանյան փորձի վերաբերյալ նմանօրինակ քննարկում կազմակերպելու համար:
«Արցախում վաղուց քննարկվում էր տեղական ինքնակառավարման համակարգի բարեփոխումների անհրաժեշտության հարցը: Քննարկվող տարբերակներից մեկն էլ ավելի խոշոր համայնքների ձևավորումն է: Այդ տարբերակի բոլոր դրական և բացասական կողմերը գնահատելու համար ՀՀ ՏԿԶ նախարարի վերջին այցին որոշեցինք տեղում ուսումնասիրել Գորիսի օրինակը: Այսօր մենք տեսանք տպավորիչ արդյունքներ, և այն կարող է որպես հիմք ծառայել մեր հետագա քննարկումների համար: Արցախում դեռևս մեծ աշխատանք ունենք կատարելու հանրային քննարկումներ կազմակերպելու ուղղությամբ: Կարծում եմ`խոշորացման գործընթացից առաջ պետք է հաշվի առնվի ամբողջ բնակչության կարծիքը»,- ասել է Գ. Մարտիրոսյանը:
Իսկ Սյունիքի մարզպետ Կարեն Համբարձումյանը նշել է, որ Սյունիքը Հայաստանի միակ մարզն է, որ խոշորացվել է գրեթե ամբողջությամբ:
«Խոշորացման շնորհիվ հնարավորություն է ստեղծվել տնտեսվող գումարներն օգտագործել մարզում այլ ծրագրեր իրականացնելու նպատակով: Այսօր մեր հիմնական շեշտըր դրվում է, որպեսզի գյուղական համայնքները հավասարեցվեն քաղաքային համայնքներին: Արդյունքում կունենանք դրական պատկեր: Գորիս և Տեղ խոշորացված համայնքներում միջազգային կառույցների աջակցությամբ իրականացվել են տարաբնույթ ծրագրեր, որոնց արդյունքում ձևավորվել են տնտեսական և ենթակառուցվածքային զարգացման նախադրյալներ»,- ավելացրել է Կ. Համբարձումյանը:
Շնորհանդես-քննարկման ավարտից հետո ՀՀ ՏԿԶ նախարար Սուրեն Պապիկյանի գլխավորությամբ տեղի է ունեցել Վերիշեն-Ակներ վերանորագված կամուրջի բացման հանդիսավոր արարողությանը։
Միջոցառմանը ներկա էին ԱՀ ԱԺ պատգամավոր Արպատ Ավանեսյանը, գյուղատնտեսության նախարար Ժիրայր Միրզոյանը, պաշտոնատար այլ անձինք Հայաստանից և Արցախից:
