«Գիտելիքը ուժ է» կրթական նախաձեռնության շրջանակներում այսօր Ստեփանակերտի Խաչատուր Աբովյանի անվան N 1 հիմնական դպրոցում ԱՀ կրթության, գիտության և սպորտի (ԿԳՍ) նախարար Նարինե Աղաբալյանը հանդիպել է Հայաստանի բուհերում սովորող մի խումբ ուսանողների հետ:
ԱՀ ԿԳՍ նախարարը հանդիպել է Հայաստանի բուհերում սովորող արցախցի ուսանողների հետ
ՍՏԵՓԱՆԱԿԵՐՏ, օգոստոսի 10, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հանդիպմանը բացման խոսքով հանդես է եկել «Գիտելիքը ուժ է» կրթական նախաձեռնության ղեկավար Անուշ Եդիգարյանը:
Նա նշել է, որ հանդիպումն առաջին հերթին նպատակ ունի, որ ուսանողները հնարավորություն ունենան իրար ճանաչելու և շփվելու:
«Մենք փորձում ենք օգնել, որ ուսանողները ձեռք բերեն ակտիվություն, նախաձեռնողականություն, որպեսզի կարողանան Հայաստանում լինել միասնական, հեշտությամբ ինտեգրվեն հասարակությանը, մասնակցեն տարբեր դասընթացների, իրենց կարծիքներն ու առաջարկությունները հայտնեն, և հանդես գան ծրագրերով: Ստացած գիտելիքները նրանք հետագայում կկարողնան իրականացնել Արցախի կրթական համակարգում»,-ասել է Ա. Եդիգարյանը:
Նախարար Նարինե Աղաբալյանն էլ ասել է, որ ամեն տարի Հայաստանի Հանրապետության կառավարությունը նպատակային տեղեր է հատկացնում արցախցի ուսանողների համար, որը կրկնակի բարձրացնում է վերջիններիս պատասխանատվությունն առաջադիմության և ակտիվության գործում:Այս տարի Հայաստանի բուհերում պետպատվերի շրջանակներում Արցախից սովորելու է շուրջ 60 ուսանող:
«Կրթական համակարգի շրջանակներում այսպիսի ձևաչափով հանդիպումը նոր ավանդույթի սկիզբն է համարվում: Հայաստանի բուհերում սովորող արցախցի ուսանողների հետ մինչ այժմ կարծես թե կտրված է եղել մեր կապը, ինչն էլ գուցե և պատճառ է դարձել, որ շրջանավարտների մի մասը չեն եկել Արցախում աշխատելու: Պետք է խրախուսել մեր ուսանողներին, որպեսզի իրենց ձեռք բերած փորձը, գիտելիքները ներդնեն Արցախի զարգացմանն ուղղված ծրագրերին, խնդիրների լուծմանը, ինչպես նաև իրենց ոլորտում լինեն մրցունակ մասնագետներ: Հույս ունենք, որ Հայաստանի բուհերում սովորող ուսանողները լավ կսովորեն, ձեռնամուխ կլինեն գիտելիքներ ձեռք բերելու գործում, կլինեն նաև միասնական ու նպատակասլաց ու կձգտեն ներգրավել միջազգային կրթական կազմակերպություններում»,-մասնավորապես ասել է Ն. Աղաբալյանը:
Հանդիպման վերջում անմիջական ու ակտիվ երկխոսություն է տեղի ունեցել ուսանողների և նախարար Ն. Աղաբալյանի միջև:
