«Թուֆենկյան» բարեգործական հիմնադրամի աջակցությամբ Քաշաթաղի շրջանի Գետամեջ համայնքի սիրիահայ Արթին և Քրիստինե Ալմաջյանների ընտանիքը բնակարանամուտ է տոնել:
Քաշաթաղի շրջանի Գետամեջ համայնքի սիրիահայ ընտանիքը բնակարանամուտ է տոնել (լուսանկարներ)
ՍՏԵՓԱՆԱԿԵՐՏ, սեպտեմբերի 28, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ բնակարանամուտին ներկա էին «Թուֆենկյան» հիմնադրամի գործադիր տնօրեն Րաֆֆի Դուդակլյանը, Արցախի գրասենյակի տնօրեն Էդիկ Գրիգորյանը, Լոս Անջելեսից Արցախ ժամանած բնակարանի վերակառուցման աշխատանքների հովանավոր Լիզա Գրիգորյանը, հիմնադրամի այլ աջակիցներ և համագյուղացիներ:
Արթին Ալմաջյանը, մեզ հետ զրույցում, պատմել է, որ մինչ Գետամեջ գալն ինքն ապրում էր Սիրիայի Դամասկոս քաղաքում: Այնտեղ ինքը ավելի քան 4 տարի մասնակցել է սիրիական պատերազմին և ոտքից վիրավորվել: 2015 թվականին է իր ընտանիքով տեղափոխվել և բնակություն հաստատել Գետամեջում:
«Այստեղ էլ ես հանդիպել եմ Քրիստինեին և ամուսնացել. առայժմ ունենք երկու երեխա: Այսօր ապահովվել ենք նոր և հարմարավետ բնակարանով, ինչի մասին շատ էինք երազում: Ես այստեղ զբաղվում եմ հողագործությամբ և անասնապահությամբ»,-ավելացրել է Ա. Ալմաջյանը:
Քրիստինե Ալմաջյանն էլ ասել է, որ յուրաքանչյուր նորաստեղծ ընտանիքի, նամանավանդ վերաբնակչի համար, շատ կարևոր է սեփական տուն ունենալը:
ՀՀ Եղեգնաձոր քաղաքից 6 տարի առաջ էլ Քրիստինեն է տեղափոխվել Գետամեջ. գյուղի դպրոցում դասվանդում է հայոց լեզվի և գրականություն:
Նա ևս իր շնորհակալությունն է հայտնել «Թուֆենկյան» բարեգործական հիմնադրամի բոլոր աջակիցներին և խոստացել, որ իրենց և իրենց նման մտածողմներն են շեն պահելու Արցախի ազատագրված հայոց պատմական տարածքները:
«Թուֆենկյան» հիմնադրամի գործադիր տնօրեն Րաֆֆի Դուդակլյանի խոսքով՝ 2018 թվականի ընթացքում իրենք արդեն 3 բնակարանն են հանձնել Արցախում վերաբնակություն հաստատած ընտանիքներին, իսկ 2 բնակարան էլ տրվել է «Բնակարանային օգնություն վիրավոր զինվորներին» ծրագրի շրջանակներում:«Այս տարի նախատեսված է Քաշաթաղի շրջանի Հերիք և Հակ համայնքներում ևս երկու վերաբնակիչ ընտանիքների բնակարան հանձնել: Հիմնադրամի բարեգործական նման աշխատանքները խթան են հանդիսանում, որ Արցախի ազատագրված պատմական տարածքներում վերաբնակվող ընտանիքների թիվն էլ ավելանա: Ուրախ ենք, որ բնակարանների կարիք ունեցող ընտանիքների թիվն ավելանում է. դա նշանակում է, որ Քաշաթաղում ապրել ցանկացողների թիվը շատանում է»,-ավելացրել է Ռ. Դուդակլյանը:
