Նոր Հարավային Ուելս նահանգի նահանգապետ Գլեդիս Բերեջիկլյանը կրկին դիմել է դաշնային կառավարությունում իր գործընկերներին՝ կոչ անելով Առաջին աշխարհամարտի տարիներին թուրքական կառավարության կողմից 1,5 մլն հայերի սպանությունը պաշտոնապես որպես ցեղասպանություն ճանաչել:
Նոր Հրվ. Ուելսի նահանգապետը վստահ է, որ Ավստրալիան կճանաչի Հայոց ցեղասպանությունը
ՍՏԵՓԱՆԱԿԵՐՏ, 25 ապրիլի, ԱՐՑԱԽՊՐԵՍ: Tert.am-ի փոխանցմամբ, գրում է smh.com.au կայք, Հայոց ցեղասպանության 104-րդ տարելիցին նվիրված ելույթում նահանգապետն անդրադարձել է նաև Թուրքիայի ժխտողական քաղաքականությանը՝ ընդգծելով, որ նման դիրքորոշումն այլ պետություններին հնարավորություն է տալիս գործել այդ սարսափելի հանցագործությունները՝ հավատացած լինելով, որ իրենք կխուսափեն հետևանքներից:
«Այդիսկ պատճառով մենք երբեք չպետք է մոռանանք»,-ասել է Ցեղասպանությունից մազապուրծ եղած գաղթականների ժառանգ Բերեջիկլյանը:
Աղբյուրը մանրամասնում է, որ Ցեղասպանության 104-րդ տարելիցին նվիրված միջոցառման ժամանակ հայ համայնքի ներկայացուցիչները խիստ քննադատել են Ավստրալիայի վարչապետ Սքոթ Մորիսոնին՝ նախկինում «ցեղասպանություն» եզրույթն օգտագործելու, սակայն այժմ դրանից հրաժարվելու համար:
Վարչապետը մանրամասնել է, որ նախկինում «ցեղասպանություն» եզրույթն օգտագործել է որպես անհատ քաղաքացի, սակայն այժմ ինքը վարչապետ է և ներկայացնում է երկրի դիրքորոշումը: Հայտնի է, որ Ավստրալիայի դաշնային կառավարությունը Ցեղասպանությունը պաշտոնապես չի ճանաչել:
Սակայն տիկին Բերեջիկլյանը վստահություն է հայտնել առ այն, որ Ավստրալիան կհետևի իր ղեկավարած նահանգի օրինակին և ի վերջո պաշտոնապես կճանաչի Ցեղասպանությունը:
«Երախտապարտ եմ ավստրալական որոշ նահանգներին և աշխարհի պետություններին Հայոց ցեղասպանությունը ճանաչելու համար: Եվ, իհարկե, անհամբեր սպասում եմ այն օրվան, երբ Ավստրալիայի կառավարությունը նույնը կանի»,-ասել է նահանգապետը:
Այս հարցում Բերեջիկլյանի հետ համակարծիք են եղել մի շարք օրենսդիրներ, որոնց թվում են եղել Թրանթ Զիմերմանը, Կրիստինա Կենալին և Ուոլթ Սոքորդը:
