Մեծի Տանն Կիլիկիո կաթողիկոսության նախաձեռնությամբ Բեյրութում այսօր՝ հուլիսի 2-ին, մեկնարկել է Հայ մամուլի համահայկական համագումարը, որին մասնակցում են նաև արցախյան մամուլի պատասխանատուները:
Բեյրութում մեկնարկած Հայ մամուլի համահայկակական համագումարին մասնակցում են նաև Արցախից
ՍՏԵՓԱՆԱԿԵՐՏ, 2 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ համագումարին բացման խոսքով հանդես է եկել Մեծի Տանն Կիլիկիո կաթողիկոս Արամ Առաջինը։
Նա նշել է, որ 2019 թվականը հռչակվել է որպես Հայ մամուլի տարի։ Արամ Առաջինը խոսել է առկա համահայկական քարոզչական դաշտի խնդիրների մասին, անդրադարձել ներքին և արտաքին մարտահրավերներին:
Մեծի Տանն Կիլիկիո կաթողիկոսն իր ելույթում ընդգծել է նաև, որ Էլեկտրոնային լրատվությունը և հատկապես անհատական ցանցերը լեցուն են բռնություն հրահրող, թշնամություն սերմանող և անորակ լուրերով ու մեկնաբանություններով:
Այնուհետև Լիբանանում ՀՀ դեսպան Վահագն Աթաբեկյանն ընթերցել է ՀՀ վարչապետ Նիկոլ Փաշինյանի ողջույնի խոսքը՝ ուղղված համագումարի մասնակիցներին:
Համագումարին Արցախից մասնակցում են «Արցախպրես» լրատվական գործակալության տնօրեն Վահրամ Պողոսյանը, «Ազատ Արցախ» հանրապետական թերթի խմբագիր Նորեկ Գասպարյանը, ՀՅԴ «Ապառաժ» պաշտոնաթերթի խմբագիր Արա Պուլուզյանը և Արցախի հանրային ռադիոյի խմբագիր Միքայել Հաջյանը։
Համագումարին «Արցախպրես» լրատվական գործակալության տնօրեն Վահրամ Պողոսյանը հանդես է եկել «Արցախյան մամուլը. մարտահրավերներ և խնդիրներ» թեմայով ելույթով:
Նա անդրադարձել է արցախյան մամուլի խնդիրներին, համահայկական մեդիադաշտում դրանց առանձնահատկություններին և լուծման գործում համահայկական ներուժի արդյունավետ օգտագործմանը:
Վ. Պողոսյանը կարևորել է տեղեկատվական դաշտում տեխնոլոգիական առաջընթացին համահունչ քայլելը և մասնագետների պարբերաբար վերապատրաստումը, ինչպես նաև առաջնահերթությունների ճշգրտմամբ համահայկական մարտահրավերների միասնական օրակարգի ձևավորումը:
«Արցախպրես» լրատվական գործակալության տնօրենին ընդունել է Մեծի Տանն Կիլիկիո կաթողիկոս Արամ Առաջինը:
Արցախյան մամուլի ներկայացուցիչները համագումարի ընթացքում հանդես կգան ելույթներով: Միքայել Հաջյանն ու Արա Պուլուզյանը կհամակարգեն տարբեր նիստերի աշխատանքները:
Արամ Առաջին կաթողիկոսի հրավերով՝ համագումարին ներկա էր նաև ՀՀ վարչապետ Նիկոլ Փաշինյանի տիկին Աննա Հակոբյանը:
