ՍՏԵՓԱՆԱԿԵՐՏ, 23 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Ստեփանակերտի   քաղաքապետի  տեղակալ Արմեն Հակոբյանն  ասել է, որ   տոնին  ընդառաջ՝    մայրաքաղաքի     մի  շարք    փողոցներում      պաստառներ  են  կպցվել:

Նրա  խոսքով՝  սեպտեմբերի 26-ին  մայրաքաղաքի N8 ավագ  դպրոցում  կազմակերպվելու  է  «Չքնաղ  իմ  Ստեփանակերտ»   խորագրով  շարադրությունների, իսկ  N3   դպրոցում՝    ասմունքի   մրցույթներ:

 «Համաձայն քաղաքի օրվա տոնակատարության կազամակերպման և անցկացման միջոցառումների ծրագրի՝ սեպտեմբերի 28-ի առավոտյան ժամը 11-ին,  տեղի  կունենա ծաղկեպսակադրություն՝  Ստեփան  Շահումյանի    հուշարձանի  պատվանդանին:   Որից  հետո   Ս. Շահումյանի անվան օղակաձև պուրակում  կազմակերպվելու  են  պլենարային  նկարչություն,   ձեռքի  աշխատանքների  ցուցահանդես-տոնավաճառ, ինչպես  նաև  բռնցքամարտի    ցուցադրական  պարապմունքներ     և  շախմատի  մրցույթ:  Միջոցառումներն  ուղեցվելու  են   Արցախի  փողային  նվագախմբի     կատարումներով: Նույն  օրը՝    մայրաքաղաքի  6-րդ  դպրոցում   տեղի  կունենա    սանտա-ուշուի   բաց    առաջնություն, իսկ   N1  կրթօջախում՝   ձյուդոյի, կիոկուշին-կարատեի   ցուցադրական  վարժություններ,  ինչպես  նաև   պարանի   ձգում,  շարային  վարժություններ  զենքով,  սպորտային  պարերի   ցուցադրություն»,-մասնավորապես ասել  է  Ա. Հակոբյանը:

 

Մեր  զրուցակիցը  տեղեկացրել  է  նաև, որ  Ստեփանակերտի  քաղաքապետարանը  կազմակերպելու է նաև    այցելություններ   մայրաքաղաքի    Մոր  և  մանկան  առողջության   պահպանման    կենտրոն  և  հարսանյաց    հանդիսությունների  սրահներ՝   շնորհավորելու  նորածիններին  և   նորապսակներին:

Փոխքաղաքապետը  նշել  է, որ  տոնական    միջոցառումները   եզրափակվելու  են   Ստեփանակերտի  մշակույթի  և  երիտասարդության  պալատում   կայանալիք  համերգային   ծրագրով:

 

Միջոցառումներին  մասնակցելու  են     ինչպես     ԱՀ  պետական    այրեր, այնպես   էլ    ՀՀ պատվիրակության  անդամներ:

 

Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -39-: