Կիպրոսի Հանրապետության Սթրովոլոս քաղաքի քաղաքապետի գլխավորած պատվիրակությունը Ստեփանակերտում կայացած մամուլի ասուլիսի ընթացքում ամփոփել է եռօրյա այցի արդյունքները:
Մենք պետք է Արցախի լավ դեսպանները լինենք ոչ միայն Կիպրոսում, այլև ամենուր. Սթրովոլոսի քաղաքապետ
ՍՏԵՓԱՆԱԿԵՐՏ, 29 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` ասուլիսին ՀՅԴ Հայ դատի Եվրոպայի հանձնախմբի նախագահ Գասպար Կարապետյանն ասել է, որ այցի շրջանակներում Սթրովոլոսի քաղաքապետի գլխավորած պատվիրակությունը հանդիպումներ է ունեցել Արցախի Նախագահի, Ազգային ժողովի նախագահի, Խորհրդարանի Եվրոպայի հետ բարեկամական խմբի անդամների, արտաքի գործերի նախարարի, ինչպես նաև Ստեփանակերտի գործող և նորընտիր քաղաքապետերի հետ:
Բացի դրանից, պատվիրակության անդամներն այցելել են Ստեփանակերտի «Թումո» ստեղծարար տեխնոլոգիաների կենտրոն, «The Halo Trust» միջազգային ոչ կառավարական կազմակերպություն, «Մենք ենք մեր սարերը» հուշահամալիր:
Իր հերթին Սթրովոլոսի քաղաքապետ Անդրեաս Պապախարալամպուսն ասել է, որ Կիպրոսում և, մանավանդ, Սթրովոլոսում հայկական համայնքն ակտիվ գործունեություն է ծավալում:
«Արցախ կատարած այցի ընթացքում մենք տեսանք գեղեցիկ մի երկիր, որն ունի հյուրասեր ժողովուրդ: Մենք տպավորված ենք ունեցած ջերմ հյուրասիրությունից: Այլ քաղաքներ, որտեղ մենք ևս այցելել ենք, նման հյուրասիրության ականատես չենք եղել: Արցախի ժողովուրդն ապրել է բավականին դժվար կյանքով: Մենք այստեղ ենք Արցախի ժողովրդի հետ կապեր ստեղծելու համար: Եռօրյա այցի ընթացքում ունեցած հանդիպումները գնահատում ենք բավականին արդյունավետ, քանի որ տարբեր քննարկումներ ենք ունեցել մշակույթի, կրթության, սպորտի և գիտության բնագավառներում: Հավաստիացնում ենք, որ մեր դռները և սրտերը միշտ բաց են լինելու Արցախի ժողովրդի համար»,- նշել է Անդրեաս Պապախարալամպուսը:
Սթրովոլոսի քաղաքապետը հավաստիացրել է, որ իրենք պետք է Արցախի լավ դեսպանները լինեն ոչ միայն Կիպրոսում, այլև ամենուր:
Մամուլի ասուլիսին Անդրեաս Պապախարալամպուսը պատասխանել է լրագրողների կողմից բարձրացված մի շարք հարցերին:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -11-:
