ՍՏԵՓԱՆԱԿԵՐՏ, 31 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ իր խոսքում Գագիկ Բաղունցը նշել է, որ ընթացիկ ամսում Երևանում տեղի ունեցած Տեղեկատվական տեխնոլոգիաների համաշխարհային կոնգրեսին (WCIT), ինչպես իր խոսքում նշեց ՀՀ վարչապետը, Հայաստանի առջև խնդիր է դրված դառնալ համաշխարհային տեխնոլոգիական առաջնորդներից մեկը:

«ՀՀ կառավարությունը տեղեկատվական տեխնոլոգիաների ոլորտը հայտարարել է ռազմավարական նշանակության: Հայկական տեխնոլոգիական գերազանցությունը ապահովելու նպատակով կառավարությունը նախատեսում է կրկնապատկել կրթական և ինստիտուցիոնալ ենթակառուցվածքների ֆինանսավորումը: Իսկ ինչպիսի՞ն է ԱՅ ԹԻ ոլորտի վիճակը Արցախում: Ցավոք նշեմ, որ կոնգրեսում, ուր Արցախը ներկայացնում էր պետական նախարար Գրիգորի Մարտիրոսյանը, փաստորեն չեն մասնակցել Արցախում աշխատող ԱՅ ԹԻ ընկերությունների ղեկավարները և առաջատար մասնագետները՝ դրանով իսկ լուրջ հնարավորություն կորցնելով կողմնորոշվելու սրընթացորեն զարգացող ԱՅ ԹԻ ոլորտի տենդենցիաներում: Տնտեսության զարգացման կարևորագույն ուղղություններից մեկի նկատմամբ նման վերաբերմունքը արտացոլվում է նրանով, որ ծրագրավորողների թիվը Արցախում չի գերազանցում 100-ը, իսկ Հայաստանում գերազանցում է 20 հազարը: Տոկոսային հարաբերությամբ մեզ մոտ մոտ 10 անգամ քիչ է: Զբաղված լինելով 2020 թվականին Արցախում սպասվող նախագահական և խորհրդարանական ընտրություններում վերարտադրության խնդիրներով՝ Արցախի ներկայիս իշխանություններն անտեսում են ԱՅ ԹԻ ոլորտի կայացման և կրթության որակի հիմնախնդիրները: Ավելին՝ ՀՀ ղեկավարության հետ հարաբերություններում աճող քաղաքական լարվածությունը, ՀՀ իշխանությունների ոչ լեգիտիմության մասին աբսուրդի հասնող հայտարարությունները լուրջ արգելք են հանդիսանում տեխնոլոգիական և կրթական ոլորտներում մեր ռազմավարական համագործակցության համար: Կա երկու անվիճարկելի փաստ, կայացած ԱՀ փաստացի գոյություն և երկու հայկական պետությունների միացման տեսլականով վերջնական նպատակ: Դրանք պետք է լինեն ոչ թե առճակատման առարկա, այլ հանդիսանան մեկ միասնական գործընթացի երկու ափ: Իմ խորհրդակցությունները Ռուսաստանի, Հայաստանի և Արցախի ԱՅ ԹԻ ընկերությունների առաջատար մասնագետների հետ թույլ են տալիս հստակ ուրվագծել ԱՅ ԹԻ ոլորտի զարգացման ուղիները: Անհրաժեշտ է միայն իշխանությունների քաղաքական կամքը տեխնոլոգիական և կրթական առաջադիմության կոնկրետ ռազմավարական ծրագրի մշակման, մասնավորապես՝ տեխնոկենտրոնի ստեղծման հարցում: Դիմում եմ գործընկերներիս 2020 թվականի պետական բյուջեում նախատեսել համապատասխան ֆինանսավորում»,- նշել է Գ. Բաղունցը:

Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -52-: