Նոր ուսումնական տարում սովորողների համար իր դռները կբացի Շուշիի նորակառույց արհեստագործական ուսումնարանը։
Շուշիի արհեստագործական նորակառույց ուսումնարանը սովորողներին բացառիկ պայմաններ է առաջարկում
ՍՏԵՓԱՆԱԿԵՐՏ, ՀՈՒԼԻՍԻ 20, ԱՐՑԱԽՊՐԵՍ: Այդ մասին «Արցախպրես»-ի թղթակցի հետ զրույցում տեղեկացրեց «Եզնիկ Մոզյան արհեստագործական ուսումնարան»-ի (ԵՄԱՈՒ) ընդհանուր տնօրեն Վասպուրակ Կարապետյանը՝ հավելելով, որ ուսումնարանը 2015-2016 ուսումնական տարվա սովորողների համար հունիսի 1-ից սկսել է ընդունելության գործընթացը:
Նրա խոսքով՝ Շուշիի արհեստագործական կրթօջախն առաջարկում է ուսումնառության ժամանակակից և եվրոպական չափանիշներին համապատասխանեցված մանկավարժական և դասավանդման մեթոդներով ուսուցում, որոնք մշակվել են ֆրանսիացի և հայ մասնագետների կողմից:
Ֆրանսիայում վերապատրաստման դասընթացներն անցած, վարպետ-մասնագետների ուսուցմամբ, սովորող–աշկերտները կարող են մասնագիտանալ շինարարամոնտաժային և վերանորոգման աշխատանքների,հարդարման շինարարական աշխատանքների իրականացում, ջերմաէներգետիկ սարքավորումների և ջերմային ցանցերի մոնտաժում և տեխնիկական շահագործում, շենքերի և կառույցների սանիտարատեխնիկական սարքավորումներ մասնագիտությունների գծով:
Ուսումնարանում կկահավորվի հինգ արհեստանոց՝ 3-ը համաշինարարական, ջերմատեխնիկական և սանիտարատեխնիկական ու հարդարման շինարարական աշխատանքների մասնագիտությունների գծով: Վերջինս արդեն կգործի նոր ուսումնական տարում, իսկ մյուս երկուսը՝ գալիք տարի։
Արհեստագործական ուսումնարանում, որը նախատեսված է 450-500 սովորողների համար, կարող են ուսուցանել 9-րդ դասարանն ավարտած աշակերտներ:
«Այս ուսումնական տարում նախատեսում ենք ունենալ 60-90 սովորող՝ յուրաքանչյուր խմբում 20-30 աշկերտի ընդգրկմամբ: Բացի Արցախի տարբեր բնակավայրերից, մեր ընդունելության հայտարարությանն արձագանքել են նաև Սյունիքի մարզից և առաջիկայում նախատեսում ենք հանդիպումներ ունենալ նաև այնտեղ»,-ասել է Վ. Կարապետյանը:
Անդրադառնալով ուսումնարանի շենքի՝ արդեն ավարտին մոտեցող շինարարական աշխատանքներին, ԵՄԱՈՒ ընդհանուր տնօրենը նշել է, որ ներկայումս ուսումնական մասնաշենքի շինարարական աշխատանքներն ավարտման փուլում են, և ընթանում են մոնտաժային ու շինարարական թափոնի մաքրման աշխատանքներ:
Այն, հանգամանքը, որ այս տարի շինարարական աշխատանքները ավարտին չհասցնելու պատճառով, ուսումնարանի սովորողների համար նախատեսված հանրակացարանային մասնաշենքը չի շահագործվելու, ըստ Վ. Կարապետյանի պարզաբանման՝ չի խոչընդոտի սովորողների կեցության պայմանների ապահովելուն: Մինչև հանրակացարանի շենքի շահագործման հանձնելը, արհեստագործական ուսումնարանի սովորողները կտեղավորվեն Շուշիի հյուրանոցներում: Բացի այդ, կգործի նաև ուսանողական անվճար ամենօրյա երթուղային ավտոբուս՝ Ասկերան-Ստեփանակերտ-Շուշի երթուղով:
«Ժամանակակից բոլոր պայմաններով ուսումնանյութական հագեցած բազայով ապահովված ուսումնարանում, ի տարբերություն մյուս ուսումնական հաստատությունների, սովորողները կկոչվեն աշկերտ։ Մեկ շաբաթ սովորելով ուսումնարանում՝ աշկերտները փորձուսուցումն անցնելու են շինհարթակներում, որի դիմաց էլ վարձատրվելու են»,- ասել է Վ. Կարապետյանը և ավելացրել, որ առաջին տարում վարձատրությունը կլինի ամսական բազային աշխատավարձի 40 տոկոսի չափով, 2-րդ տարում՝ 50 տոկոսի չափով, իսկ երրորդում՝ 60:
Շրջանավարտները եռամյա ուսումնառության ընթացքում կստանան ամենամսյա կրթաթոշակ, իսկ ավարտին՝ պետական նմուշի դիպլոմ։ Սովորողները կապահովվեն հանրակացարանային պայմաններով, սակայն տեղերի սահմանափակ լինելու պատճառով, ովքեր չեն տեղավորվի, բնակարանային վարձավճարը կհոգա ուսումնարանը։ Ի դեպ, ուսումը վճարովի կլինի միայն արտերկրից եկածների համար:
Նշենք նաև, որ Շուշիի արհեստագործական ուսումնարանի կառուցման հիմնաքարը դրվել է 2009 թվականին՝ ըստ ֆրանսահայ բարերար Եզնիկ Մոզյանի կտակի և կրում է նրա անունը: Կրթօջախի առաքելությունն է՝ պատրաստել որակյալ մասնագետներ՝ համալրելու համար աշխատաշուկան, ուր կա այդ արհեստագործական մասնագիտությունների գծով մեծ պահանջարկ:
