Հայաստանի գլխավոր դատախազությունը հաստատել է պետական դավաճանության համար մեղադրվող չորս անձանց մեղադրանքը, և քրեական գործն ուղարկել Երևանի Կենտրոն և Նորք Մարաշ վարչական շրջանների ընդհանուր իրավասության դատարան:
Շուտով կմեկնարկի պետական դավաճանության համար մեղադրվող խմբի դատավարությունը
ՍՏԵՓԱՆԱԿԵՐՏ, հունվարի 11, ԱՐՑԱԽՊՐԵՍ: Ադրբեջանի հետախուզական ծառայությունների համար Հայաստանից տեղեկություն փոխանցելու համար մեղադրվողների գործով դատական նիստերը կնախագահի դատավոր Արշակ Վարդանյանը: Գործը այս դատարանի վարույթ է ուղարկվել նախորդ տարեվերջին և դեռևս չի նշանակվել առաջին քննության օրը:
Դատական տեղեկատվական համակարգի փոխանցմամբ` խմբի անդամներից մեկը 46-ամյա մի կին է` Կ. Ղումաշյան, իսկ մյուսը դեռատի աղջիկ` 18-ամյա Դ. Գորոյանը:
Ըստ աղբյուրի, խմբի ղեկավարը Ռաֆիկ Պապոյանն է եղել և նրան մեղադրանքն առաջադրվել է այն բանի համար, որ նա բնակվելով Թուրքիայում, հավաքագրվել է այդ երկրի տարածքում գործունեություն ծավալած, Ադրբեջանի հետախուզական ծառայությունների աշխատակիցը հանդիսացող, Սեյրան անունով մի անձի կողմից և կատարել այդ հետախուզական ծառայության առաջադրանքները` Հայաստանից Թուրքիա ժամանած ՀՀ քաղաքացիների միջից ընտրել է Ադրբեջանի հետախուզական ծառայությունների համար հետաքննություն ներկայացնող անձանց ու հավաքագրման նպատակով ծանոթացնել նրանց հետ:
Կարինե Ղումաշյանին մեղադրանքն առաջադրվել է այն բանի համար, որ նա բնակվելով Թուրքիայում, հայտնվել է այդ երկրի տարածքում գործունեություն ծավալած Ադրբեջանի հետախուզական ծառայությունների տեսադաշտում:
Արդյունքում 2013-ին հավաքագրվել այդ ծառայությունների աշխատակիցը հանդիսացող Արման անունով ներկայացած անձի կողմից: Ստանալով վարձատրություն` ընդհանուր մոտ 1500 ԱՄՆ դոլար գումարի չափով, ստացել է առաջադրանք` կիրառելով գաղտնապահության կանոնների պահպանման մեթոդները` Հայաստանի տարածքից չզանգահարել Արման անունով ներկայացած անձին և այդ ծանոթության մասին ոչ մեկին չհայտնել:
Մյուս մեղադրյալը Սերգեյ Պապոյանն է, որին մեղադրանքն առաջադրվել է այն բանի համար, որ նա Թուրքիայում բնակվող հոր` Ռաֆիկ Պապոյանի ուղղորդմամբ, Թբիլիսիում հանդիպել է Ադրբեջանի հետախուզականմ ծառայությունների աշխատակիցը հանդիսացող Սեյրան անունով ներկայացած անձի հետ և հավաքագրվել նրա կողմից: Այնուհետև նրան է տրամադրել տեղեկություն ԼՂՀ Մարտունու շրջանում որպես հետախույզ ժամկետային զինծառայության ընթացքում տիրապետած տեղեկությունները: Սերգեյին վճարելով 750 ԱՄՆ դոլար` Սեյրան ներկայացած անձը տվել է առաջադրանք` ընդունվել պայմանագրային ծառայության Մատաղիսի զորամասերից մեկում և տեղեկություններ հայտնել այդ զորամասի մասին` «skype», «odnoklassniki» ցանցերի միջոցով:
Այս գործով մեղադրյալ անցնող մյուս անձը 18-ամյա Դիանա Գորոյանն է, որին մեղադրանք է առաջադրվել այն բանի համար, որ նա իր հորաքրոջ աղջիկը հանդիսացող Կարինե Ղումաշյանից տեղեկացել է, որ Թուրքիայում գտնվելու ժամանակ, ծանոթացել է Արման անունով ներկայացած մի անձի հետ, որը գումար և նվերներ է տրամադրել նրան: Ըստ մեղդրական եզրակացության Դիանան հեռախոսային խոսակցության ընթացքում Կարինե Ղումաշյանից իմացել է, որ Արման անունով ներկայացած այդ անձնը հանդիսանում է արտասահմանյան հետախուզական ծառայության աշխատակից:
«Գիտակցելով, որ խոսքը գնում է վերոհիշյալ Արմանի կողմից Կարինե Ղումաշյանին հավաքագրելու, ինչպես նաև Կ. Ղումաշյանի որդուն` Տիգրան Կարապետյանին հավաքագրելու նախապատրաստության, այն է նախապատրաստվող պետական դավաճանության մասին, Դիանա Գորոյանը այդ մասին չի հայտնել իրավապահ մարմիններին», -նշված է մեղադրական եզրակացության մեջ:
Ռաֆիկ Պապոյանին, նրա որդուն` Սերգեյին և Կարինե Ղումաշյանին մեղադրանքն առաջադրվել է ՀՀ քրեական օրենսգրքի 299 հոդվածի 1-ին մասի հատկանիշներով` «Պետական դավաճանությունը՝ թշնամու կողմն անցնելը, լրտեսությունը, օտարերկրյա պետությանը կամ օտարերկրյա կազմակերպությանը կամ դրանց ներկայացուցիչներին պետական գաղտնիք հանձնելը կամ թշնամական գործունեություն իրականացնելու համար այլ օգնություն ցույց տալը, որը կատարել է Հայաստանի Հանրապետության քաղաքացին՝ ի վնաս Հայաստանի Հանրապետության ինքնիշխանության, տարածքային անձեռնմխելիության կամ արտաքին անվտանգության»:
Իսկ Դիանային մեղադրանքն առաջադրվել է ՀՀ քրեական օրենսգրքի 335 հոդվածի 1-ին մասի հատկանիշներով` հանցագործության մասին իրավապահներին չհայտնելու համար: Վերջինի նկատմամբ որպես խափանման միջոց ընտրվել է կալանքը: