Սոթք-Հաթերք ենթակայանները միացնող միաշղթա երկրորդ բարձրավոլտ օդային գիծը նախատեսվում է շահագործման հանձնել այս տարվա սեպտեմբերին:
Տեղական հէկ-երի արտադրանքը կազմում է Արցախում սպառվող էլեկտրաէներգիայի 75-80 տոկոսը
ՍՏԵՓԱՆԱԿԵՐՏ, փետրվարի 2, ԱՐՑԱԽՊՐԵՍ։ Այդ մասին «Արցախպրես»-ի թղթակցի հետ զրույցում տեղեկացրել է «Արցախէներգո» փակ բաժնետիրական ընկերության գործադիր տնօրեն Տիգրան Ծատրյանը՝ մանրամասնելով, որ 70 մեգավատ հզորությամբ այդ գիծը մեծ նշանակություն կունենա ԼՂՀ էներգոհամակարգի անխափան սնուցման և անվտանգության համար:
«Արցախէներգո»-ի գործադիր տնօրենի հաղորդմամբ՝ անցած տարի հանրապետությունում էլեկտրաէներգիայի իրացման մեծ մասը բաժին է ընկել տեղական հիդրոէլեկտրակայաններին, որոնց արտադրանքը կազմել է 222 մլն 257 հազար կիլովատ/ժամ , որը նախորդ տարվա հետ համեմատ նվազել է 2 մլն-ով:
Տ. Ծատրյանի պարզաբանմամբ՝ պատճառն անցած տարվա երաշտն ու քիչ տեղումներն են եղել: Այդուհանդերձ հանրապետությունում սպառվող էլեկտրաէներգիայի 75-80 տոկոսը ներկայումս կազմում է ներքին արտադրանքը:
«Անցած տարի ԼՂՀ էներգոհամակարգ մուտք է գործել 292 մլն 759 հազար ԿՎտ/ժ էլեկտրաէներգիա, որը 2014 թվականի համեմատ ավելացել է 4 մլն 500 հազար ԿՎտ/ժ –ով»,- նշել է Տ. Ծատրյանը՝ հավելելով, որ էլեկտրաէներգիայի օգտակար առաքումը կազմել է 246 մլն 891 հազար ԿՎտ/ժ, որից 43 տոկոսը կազմել է բնակչության սպառումը, իսկ մնացած 57 տոկոսն օգտագործվել է տնտեսության տարբեր ճյուղերում:
