Հայաստանի մարմնամարզության հավաքականը վերադարձել է Դոհայից, որտեղ մասնակցում էր աշխարհի գավաթի 9-րդ խաղարկությանը:
Հայ մարմնամարզիկները վերադարձել են Դոհայից
ՍՏԵՓԱՆԱԿԵՐՏ, 29 մարտի, ԱՐՑԱԽՊՐԵՍ: Հայ մարզիկներին դիմավորելու էին եկել Օլիմպիական խաղերի եռակի չեմպիոն Ալբերտ Ազարյանը, Սպորտի և երիտասարդության հարցերի նախարարության աշխատակիցները, մարզիկների բարեկամները, ընկերները, Ազարյանի անվան մարզադպրոցի սաները: Այս մասին հայտնում է ՀԱՕԿ-ի պաշտոնական կայքը:
Լրագրողների հետ զրույցում աշխարհի գավաթակիր, Ռիոյի Օլիմպիական խաղերի ուղեգիր նվաճած Հարություն Մերդինյանն ասաց, որ գոհ է իր մրցելույթից:
«Այս առաջնության ժամանակ կատարեցի վարժությունների նույն ծրագիրը, ինչ Գլազգոյում կայացած աշխարհի առաջնությունում, սակայն ավելի մաքուր, ուստի ստացա ավելի բարձր գնահատական: Օլիմպիական խաղերից առաջ այսպիսի արդյունքն ինձ էլ ավելի ուրախացրեց: Առաջիկայում կմասնակցենք Եվրոպայի առաջնությանը, որում կփորձեմ կատարել բարդացված տարրով վարժությունը, որը պատրաստվում եմ կատարել նաև Օլիմպիական խաղերում»,- նշեց Մերդինյանը:
Վահագն Դավթյանը կարծում է, որ աշխատելու տեղ դեռ ունի:
«Ես ու Արթուրը շատ քիչ ենք զիջել գավաթակրին: Մարմնամարզությունում ամեն ինչ պատահում է, պետք է ավելի լավ աշխատենք, որպեսզի Եվրոպայի առաջնությունում բարձր գնահատականներ ստանանք: Իմ և Արթուր Թովմասյանի ներքին մրցակցությունը միայն օգուտ է բերում երկուսիս: Մրցակցությունից մեր որակներն են բարձրանում»,- շեշտեց Դավթյանը:
Արթուր Թովմասյանը նույնպես գոհ է իր արդյունքից:
«Մենք գերազանցեցինք թե՛ մեր և թե՛ մարզիչների սպասելիքները: Սա ավելի կարևոր է մեզ համար, քան զբաղեցրած տեղերը: Հնարավոր է՝ հաղթեինք, բայց դժգոհ լինեինք: Եթե մարզիչները գոհ են, վստահաբար ես էլ եմ գոհ»,- նկատեց Արթուրը:
Դոհայում կայացած աշխարհի գավաթի 9-րդ խաղարկությունում Հարություն Մերդինյանը նժույգթափերում գրավել էր առաջին տեղը, օղակների վարժությունում Վահագն Դավթյանը նվաճել էր արծաթե, իսկ Արթուր Թովմասյանը` բրոնզե մեդալ: