Այսօր Ստեփանակերտի Խաչատուր Աբովյանի անվան N 1 հիմնական դպրոցի դահլիճում տեղի է ունեցել ընթացիկ տարվա դպրոցականների առարկայական օլիմպիադաների հանրապետական փուլի արդյունքների ամփոփման և մրցանակային տեղեր գրաված մասնակիցների խրախուսման արարողությունը:
Ստեփանակերտում ամփոփել են դպրոցականների առարկայական օլիմպիադայի արդյունքները (լուսանկարներ)
ՍՏԵՓԱՆԱԿԵՐՏ, 16 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` միջոցառմանը ԼՂՀ կրթության, գիտության և սպորտի նախարար Սլավա Ասրյանը, ողջունելով ներկաներին, շնորհավորել է օլիմպիադային մասնակցած և առաջնային տեղեր գրաված աշակերտներին և նրանց դասավանդող ուսուցիչներին:
«Աշակերտների գիտելիքների խորացման հարցում կարևոր առարկայական օլիմպիադաները նշանակություն ունեն: Թե´ քանակական և թե´ որակական առումներով այս տարվա արդյունքները նախորդ տարվա համեմատ ավելի բարձր են: Պետք է կրթվի և դաստիարակվի այնպիսի սերունդ, որը գիտելիքներով նախորդներին կգերազանցի»,- մասնավորապես ասել է Ս. Ասրյանը:
ԼՂՀ ԿԳ և սպորտի նախարարության կրթության և գիտության վարչության պետ Ռայա Մուսայելյանը մանրամասն ներկայացրել է դպրոցական առարկայական օլիմպիադային մասնակցած և առաջնային տեղեր գրաված աշակերտների և ուսուցիչների անունները:
Ռ. Մուսայելյանը մասնավորապես նշել է, որ ԼՂՀ դպրոցականների առարկայական օլիմպիադայի հանրապետական փուլին 15 առարկաներից մասնակցել է 398 աշակերտ:
«Դպրոցականների առարկայական օլիմպիադայի հանրապետական փուլին Ստեփանակերտից մասնակցել են 151 աշակերտ, Մարտակերտի շրջանից` 46, Ասկերանի` 47, Մարտունու` 53, Հադրութի` 31, Շուշիի` 28, Շահումյանի` 12 և Քաշաթաղից 30-ը: Հանրապետական փուլում լավագույն արդյունք է ցուցաբերել 73 աշակերտ: Դպրոցականների առարկայական օլիմպիադայի հանրապետական փուլի 14 առարկաներից (բացի ինֆորմատիկայից) լավագույն արդյունք ցուցաբերած 70 աշակերտների իրավունք է վերապահվել մասնակցելու ՀՀ-ում կայացած եզրափակիչ օլիմպիադայի փուլին: Հայոց լեզու, հայ գրականություն, անգլերեն, ՀԵՊ և ՆԶՊ առարկաներից նախորդ տարվա համեմատ մրցանակային տեղերի քանակը նվազել է, իսկ ռուսաց լեզու, պատմություն, մաթեմատիկա, աշխարհագրություն առարկաներից մրցանակային տեղեր գրաված աշակերտների թիվն աճել է,-ընդգծել է Ռ. Մուսայելյանը և հավելել,- Արցախից եզրափակիչ փուլին առաջին մրցանակային տեղեր գրավել է 3 աշակերտ, երկրորդ` 7, երրորդ` 5, իսկ գովասանագրերի է արժանացել 16 մասնակից»:
«Սիրելի´ աշակերտներ, Արցախին պետք են կիրթ և բանիմաց քաղաքացիներ. տարիներ անց դուք եք շարունակելու Արցախի շենացման և զարգացման գործը: Համոզված եմ, որ այս տարվա առարկայական օլիմպիադան շատ բան է տվել յուրաքանչյուրիդ: Դուք կարողացաք ապացուցել, որ ձեր պատասխանատվությունը նույնքան բարձր է, որքան առաջնագծում կանգնած հայ զինվորներինը»,- ավելացրել է Ռ. Մուսայելյանը:
Ս. Ասրյանը մրցանակակիր ուսուցիչներին ու աշակերտներին պարգևատրել է համապատասխան կարգի դպլոմներով ու դրամական պարգևներով:
Ե´վ ԼՂՀ-ում դպրոցականների առարկայական օլիմպիադայի հանրապետական և´ ՀՀ-ում եզրափակիչ փուլերին մասնակցած և պատմություն առարկայից առաջին տեղը գրաված Ստեփանակերտի Վիտալի Ջահանգիրյանի անվան N 11 ավագ դպրոցի 8-րդ դասարանի աշակերտ Արմեն Բեգլարյանը, ով առաջին անգամ է մասնակցում օլիմպիադային, նշել է. «Օլիմպիադային մասնակցելով` մենք ստույգ կարողացանք իմանալ մեր սեփական գիտելիքների պաշարը: Ես որոշել եմ դառնալ լավ պատմաբան: Անելու եմ ամեն ինչ, որ արժանի հակահարված տամ մեր հարուստ պատմությունը պղծող «վայ» պատմաբաններին: Շնորհավորում եմ բոլոր մրցանակակիրներին: Մենք շնորհակալություն ենք հայտնում մեր բոլոր այն ուսուցիչներին, ովքեր իրենց հարուստ գիտելիքների փորձը փոխանցել են մեզ»:
Միջոցատման վերջում N 1 հիմնական դպրոցի աշակերտները մրցանակակիրներին շնորհավորել են հայրենասիրական երգ ու պարով:
Հիշեցնենք նաև, որ ՀՀ-ում նախնական զինվորական պատրաստություն առարկայից օլիմպիադայի եզրափակիչ փուլը տեղի է ունենալու մայիսի 18-ին` Երևանում:
