LՂՀ մշակույթի և երիտասարդության հարցերի նախարարության նախաձեռնությամբ Ստեփանակերտի «Թումո» ստեղծարար տեխնոլոգիաների կենտրոնում անցկացվում են կարճաժամկետ վերապատրաստման սեմինար-դասընթացներ:
Ստեփանակերտի «Թումո»-ում անց են կացվում երկօրյա սեմինար-դասընթացներ
ՍՏԵՓԱՆԱԿԵՐՏ, դեկտեմբերի 24, ԱՐՑԱԽՊՐԵՍ: LՂՀ մշակույթի և երիտասարդության հարցերի նախարարության «Մասնագիտական ճիշտ կողմնորոշում» ծրագրի շրջանակներում երեկ մեկնարկել են սեմինար-դասընթացներ. դրանք վերաբերում է ռազմավարության մշակմանը: Տեղի է ունեցել նաև բուն ծրագրի առաքելության վերլուծություն:
«Արցախպրես»-ի թղթակցի հետ զրույցում սեմինար-դասընթացներն անցկացնող փորձագետ Արտակ Ալոյանը նշել է, որ դասընթացների առաջին փուլը մեկնարկել էր դեռևս նոյեմբերին: Առաջին փուլին մասնակցել են Արցախի մոտ 30 երիտասարդներ, երկրորդ փուլի մասնակիցների թիվն էլ 20-ից ավելի է:
«Առաջին փուլը վերաբերում էր առաջնորդությանը: Հենց այդ ժամանակ մենք մասնակիցներին առաջադրանքներ տվեցինք, որպեսզի երիտասարդները մտածեն ու մշակեն այնպիսի նախագծեր, որոնք բխում են համայնքների կարիքներից: Մենք ցանակնում ենք, որ այդ ամենը մասնակիցներն անեն գործնական առաջադրանքների տեսքով: Ի դեպ, այս անգամ երկրորդ փուլն ուղղորդված էր ռազմավարության մշակմանը: Կան շատ հետաքրքիր գաղափարներ, որոնք այս ծրագրի շրջանակներում ցանկանում ենք իրականացնել:
Ունենք նաև նորեկ մասնակիցներ: Այսօր մենք մեր ծրագրերի իրականացման համար կոնկրետացրել ենք մեր նպատակները, խնդիրները և գործողությունները: Հունվար ամսին կայանալու է նաև երրորդ փուլը, որի ընթացքում էլ ավելի իրատեսական ու կյանքին վերաբերող ծրագրեր կպլանավորենք ու կիրականացնենք»,- ասել է Ա Ալոյանը:
Սեմինար-դասընթացները հագեցված են հետաքրքիր ու ինտերակտիվ գործնական աշխատանքներով. այսօր էլ տեղի են ունենալու ծրագրի ամփոփումը և ապագա քայլերի պլանավորման աշխատանքները:
