ԼՂՀ համախառն ներքին արդյունքը (ՀՆԱ) անցած տարի կազմել է 168.6 մլրդ դրամ` 2012թ. 150 մլրդ դրամի փոխարեն:
ԼՂՀ արդյունաբերական արտադրանքը 2013թ. կազմել է 44 մլրդ դրամ
ԼՂՀ համախառն ներքին արդյունքը (ՀՆԱ) անցած տարի կազմել է 168.6 մլրդ դրամ` 2012թ. 150 մլրդ դրամի փոխարեն:
Այդ մասին այսօր կայացած մամլո ասուլիսի ընթացքում հայտնել է ԼՂՀ Ազգային վիճակագրական ծառայության տնօրեն Կարեն Ներսիսյանը՝ հավելելով, որ 2013թ. մեկ շնչին ընկնող ՀՆԱ-ն, ընթացիկ գներով, կազմել է 1137.9 հազ. դրամ կամ 2777.9 ԱՄՆ դոլար ՝ 2012թ. 1023.0 հազ. դրամի կամ 2546.1 ԱՄՆ դոլարի դիմաց:
Ծառայության տնօրենը նշեց նաև, որ ՀՆԱ-ի արձանագրված 9.3 տոկոս հավելաճի տեմպի 3.1 տոկոսն ապահովել է կառավարում և պաշտպանությունը, 1.6-ը` շինարարությունը, 1.4-ը` գյուղատնտեսությունը, 1.2-ը՝ արդյունաբերությունը:
Կառուցվածքային տեսանկյունից 2013թ. նախորդ տարվա համեմատ 1.6 տոկոսով աճել է ծառայությունների արտադրության ոլորտի ավելացված արժեքի տեսակարար կշիռը՝ ՀՆԱ-ի մեջ:
ՀՆԱ-ի եռամսյակային կառուցվածքի դիտարկումը ցույց է տվել, որ 2013թ. երկրորդ կիսամյակում արտադրվել է ՀՆԱ-ի գերակշռող մասը 60.6 տոկոսը նախորդ տարվա 60.0 տոկոսի փոխարեն:
Անդրադառնալով ըստ ոլորտների Արցախում արձանագրված տնտեսական ցուցանիշներին` Կ. Ներսիսյանը տեղեկացրեց, որ 2013թ. հանրապետությունում, փաստացի գներով, թողարկվել է 44.3 մլրդ դրամի արդյունաբերական արտադրանք, իրացվել է 44.2 մլրդ դրամի պատրաստի արտադրանք: 2012թ. նկատմամբ արդյունաբերական արտադրանքի ֆիզիկական ծավալի ինդեքսը կազմել է 110 տոկոս: Նախորդ տարվա նկատմամբ արդյունաբերական արտադրանքի ֆիզիկական ծավալի ինդեքսը կազմել է 121.0տոկոս հանքագործական, 100.6 տոկոս` մշակող արդյունաբերությունում և 116.3տոկոս` էլեկտրաէներգիայի, գազի, ջրի արտադրության և բաշխման ոլորտում:
ԼՂՀ արդյունաբերական արտադրանքի կառուցվածքն ըստ ոլորտների հետևյալն է. մշակող արդյունաբերություն` 43.2%, հանքագործական արդյունաբերություն` 25.7%, էլեկտրաէներգիայի, գազի, ջրի արտադրություն և բաշխում` 31.1%:
Հաշվետու ժամանակահատվածում սպառողական ապրանքների արտադրության ծավալը կազմել է 12.8մլրդ դրամ` նախորդ տարվա համեմատ աճը կազմել է 6.1 %: Վիճակագրական ծառայության տնօրենի հաղորդման համաձայն արտադրանքի աճ է արձանագրվել նաև գյուղատնտեսության բնագավառում: Ըստ այդ տվյալների գյուղատնտեսության համախառն արտադրանքը 2013թ. փաստացի գներով կազմել է 55.2 մլրդ դրամ, ինչը 2012թ. համեմատությամբ, համադրելի գներով, աճել է 9.2 տոկոսով` հիմնականում պայմանավորված բուսաբուծության համախառն արտադրանքի աճով: Անասնաբուծության համախառն արտադրանքը, համադրելի գներով, աճել է 2.1%-ով:
Սա հանգեցրել է գյուղատնտեսության համախառն արտադրանքի կառուցվածքի որոշակի փոփոխության. նախորդ տարվա համեմատ 2.8%-ային կետով աճել է անասնաբուծության տեսակարար կշիռը` կազմելով 36.7%, իսկ բուսաբուծության համախառն արտադրանքինը համապատասխանաբար` 63.3%:
Անցած տարվա գյուղատնտեսության համախառն արտադրանքի կառուցվածքում գերակշռող բաժինը պատկանում է հացահատիկի և հատիկաընդեղենի (ներառյալ եգիպտացորեն) (29.3 տոկոս) և մսի (17.9 տոկոս) արտադրությանը:
Խոսելով հաշվետու ժամանակահատվածում Արցախում իրականացված շինարարական աշխատանքների ծավալների մասին` Կ. Շահրամանյանը նշեց, որ անցած տարի հանրապետությունում իրականացվել է 45.2 մլրդ դրամի շինարարություն, ինչը նախորդ տարվա համեմատությամբ աճել է 18.1 տոկոսով: Իրականացված շինարարության ծավալում շինմոնտաժային աշխատանքները կազմել են ընդհանուրի 95.1 տոկոսը:
Շինարարության 31.6%-ը կատարվել է պետական բյուջեի, 29.9%-ը` կազմակերպությունների, 18.5%-ը` օտարերկրյա ներդրողների, 5.7%-ը մարդասիրական օգնության, 4.3%-ը` արտաբյուջետային միջոցների հաշվին: Իրականացված շինարարության 36.4%-ն է արտադրական նշանակության: Տարածքային առումով հաշվետու ժամանակաշրջանում իրականացված շինարարության 43.0%-ը բաժին է ընկել մայրաքաղաքին, 24.4%-ը` Մարտակերտի, 9.1%-ը` Քաշաթաղի շրջաններին:
Կ. Ներսիսյանի տեղեկատվությամբ ԼՂՀ արտաքին առևտրաշրջանառության ծավալն անցած տարի փաստացի գներով կազմել է 134.5մլրդ դրամ կամ 328.5մլն դոլար, այդ թվում ապրանքների արտահանումը՝ 24.4մլրդ դրամ (59.6 մլն դոլար), իսկ ներմուծումը՝ 110.1մլրդ դրամ (268.8մլն դոլար): Առևտրային հաշվեկշիռը բացասական է 85.7մլրդ դրամով (209.2մլն դոլարով):
2012թ. համեմատությամբ անցած տարվա արտաքին առևտրաշրջանառության ծավալը նվազել է 5.9 տոկոսով, ընդ որում, արտահանումը աճել է 3.2 տոկոսով, իսկ ներմուծումը նվազել է 7.7 տոկոսով: Բացասական առևտրային հաշվեկշիռը նվազել է 10.4 տոկոսով:
Հաշվետվության համաձայն, անցած տարվա ԼՂՀ սպառողական շուկան (ըստ տնտեսավարող սուբյեկտներից ստացված հաշվետվությունների և չհաշվառվող դաշտի լրահաշվարկի) կազմել է 132.1մլրդ. դրամ` նախորդ տարվա համեմատ, համադրելի գներով, աճելով 3.2տոկոսով: Հաշվետու ժամանակաշրջանում սպառողական շուկայի 85.9%-ը բաժին է ընկել մանրածախ արևտրաշրջանառությանը, 14.1%-ը ծառայություններին: Ծառայության տնօրենի խոսքով անցած տարվա մանրածախ առևտրի շրջանառությունը, ընթացիկ գներով, կազմել է 113.5մլրդ դրամ, որը 2012թ. նկատմամբ, համադրելի գներով, աճել է 3.3տոկոսով:
Անցած տարի հանրապետությունում բնակչությանը մատուցված ծառայությունների ընդհանուր ծավալը, փաստացի գներով, կազմել է 18.6մլրդ դրամ, որը 2012թ. նկատմամբ, համադրելի գներով, աճել է 2.5 տոկոսով,- նկատում է Կ. Ներսիսյանը ընդգծելով, որ բնակչությանը մատուցված վճարովի ծառայությունների կառուցվածքում մեծ տեսակարար կշիռ են կազմել կապի, տրանսպորտի և ֆինանսական գործունեության ծառայությունները, համապատասխանաբար: Բնակչությանը մատուցված ծառայությունների ընդհանուր ծավալի 77.5 տոկոսը բաժին է ընկել Ստեփանակերտին, մնացած 22.5տոկոսը մյուս շրջաններին: Միջին հաշվով մեկ բնակչին ընկնող առևտրի շրջանառության և ծառայությունների ծավալը 2013թ կազմել է 891.8հազ.դրամ` նախորդ տարվա 833.6 հազ.դրամի փոխարեն:
ԼՂՀ սպառողական շուկայում 2013թ. դեկտեմբերին ինչպես և հաշվետու տարվա ութ ամիսներին 2012թ. դեկտեմբերի նկատմամբ արձանագրվել է գնաճ,- փաստեց Վիճակագրական ծառայության տնօրենը, նշելով որ սպառողական գների ընդհանուր մակարդակի փոփոխությունը պայմանավորված է համաշխարհային շուկայում զարգացումների, պարենային որոշ ապրանքատեսակների գնաճի, առանձին պարենային ապրանքատեսակների սեզոնայնության, սպառման կառուցվածքի, պահանջարկի և առաջարկի հարաբերակցության փոփոխությամբ:
Կ. Ներսիսյանը տեղեկացրեց նաև որ ԼՂՀ-ում 2013թ. դեկտեմբերին 2012թ. դեկտեմբերի համեմատ սպառողական գների ինդեքսը կազմել է 105.9 տոկոս: 2013թ. հունվար-դեկտեմբերին նախորդ տարվա համապատասխան ժամանակահատվածի համեմատ սպառողական գների ինդեքսը կազմել է 104.9 տոկոս, այդ թվում պարենային ապրանքներինը (ներառյալ ոգելից խմիչք և ծխախոտ)՝ 104.3 տոկոս, ոչ պարենային ապրանքներինը՝ 105.6, ծառայությունների սակագներինը՝ 105.5 տոկոս:
Վկայակոչելով հունվարի 1-ի դրությամբ հանրապետության տարածքում գործող առևտրային բանկերի կողմից ներկայացրած հաշվետվությունները, Կ. Ներսիսյանը նշեց, որ բանկերից վերված վարկերը կազմել են 82.9մլրդ դրամ և 2013թ. հունվարի 1-ի համեմատ աճել են 4.3%ով: 2014թ. հունվարի 1-ի դրությամբ ներգրավված ավադները կազմել են 55.9մլրդ դրամ և 2013թ. հունվարի 1-ի դրությամբ աճել են 13.4 %-ով:
