Հավաքական անվտանգության պայմանագրի կազմակերպության անդամ երկրների ղեկավարների կողմից Լեռնային Ղարաբաղի հակամարտության կարգավորման վերաբերյալ հայտարարության ընդունումը վկայում է, որ կազմակերպության անդամ բոլոր երկրները սատարում են Մինսկի խմբի համանախագահությանը՝ հակամարտության կարգավորման հարցում, և ընդունում են նրանց առաջարկած երեք հիմնարար սկզբունքները:
ՀԱՊԿ անդամ երկրները ընդունում են Արցախի ժողովրդի ինքնորոշման իրավունքը. Շարմազանովը` ՀԱՊԿ երկրների ղեկավարների ընդունած հայտարարության մասին
ՍՏԵՓԱՆԱԿԵՐՏ, 30 նոյեմբերի, ԱՐՑԱԽՊՐԵՍ: «Արմենպրես»-ի հետ զրույցում այս մասին նշեց ՀՀ Ազգային ժողովի փոխնախագահ Էդուարդ Շարմազանովը՝ հավելելով, որ Ադրբեջանը հաճախ է փորձում ընդհանուր սկզբունքներից առանձնացնել տարածքային ամբողջականության սկզբունքը և խնդիրը ներկայացնել որպես տարածքային վեճ Հայաստանի և Ադրբեջանի միջև, ու եղել են պետություններ, որոնք, միգուցե, միտումնավոր կամ ոչ միտումնավոր անտեսել են մյուս երկու սկզբունքները, իսկ այդ համատեքստում ՀԱՊԿ անդամ երկրների ղեկավարների ընդունած հայտարարությունը չափազանց կարևոր է: «ՀԱՊԿ անդամ երկրների ղեկավարների կողմից նման հայտարարության ընդունումը խոսում է այն մասին, որ այդ կազմակերպության անդամ բոլոր երկրները` սկսած Ռուսաստանից մինչև Ղազախստան և Բելառուս, ընդունում են հակամարտության կարգավորման երեք հիմնարար սկզբունքները, որոնք առաջարկում են համանախագահները, այդ թվում` մեզ համար շատ կարևոր ինքնորոշման իրավունքի սկզբունքը: Այսինքն, նրանք ընդունում են Արցախի ժողովրդի ինքնորոշման իրավունքը, ինչը մեզ համար շատ կարևոր է»,- ընդգծեց Շարմազանովը: ՀՀ ԱԺ փոխնախագահը հավելեց, որ ՀԱՊԿ անդամ երկրների ղեկավարների կողմից ԼՂ հակամարտության կարգավորման վերաբերյալ Մինսկի խմբի համանախագահների միջնորդության ձևաչափին սատարելու մասին հայտարարության ընդունումն արժանի պատասխան էր նոյեմբերի 29-ին Սևծովյան տնտեսական համագործակցության խորհրդարանական վեհաժողովում ադրբեջանա-թուրքական հնարքին, երբ առանց հայկական պատվիրակության հետ քննարկելու հակամարտությունների կարգավորման վերաբերյալ հակահայկական ձևակերպումներ պարունակող կետ էին ներառել ընդունված հռչակագրում: «Սա հստակ պատասխան էր, որ հանգիստ ձեր տեղերում մնացեք, ՀԱՊԿ անդամ երկրները սատարում են հակամարտության կարգավորման ձևաչափին, որն առաջարկում է Մինսկի խմբի համանախագահությունը»,- շեշտեց ՀՀ ԱԺ փոխնախագահը: Նա նաև հիշեցրեց, որ ԼՂ հակամարտության կարգավորման հարցում Մինսկի խմբի միջնորդական ջանքերին աջակցելու մասին հստակ ամրագրված է Հայաստանի և Եվրոպական Միության միջև օրերս ստորագրված համաձայնագրում, ինչը նշանակում է, որ բոլոր միջազգային կառույցները, ԵՄ-ն, ՀԱՊԿ-ն ընդունում են համակարգության կարգավորման երեք հիմնարար սկզբունքները, որոնց թվում է նաև հայկական կողմի համար շատ կարևոր ինքնորոշման իրավունքի սկզբունքը:
