ԼՂՀ վարչապետ Արա Հարությունյանն ապրիլի 1-ին հրավիրել է աղբահանության և գարնանացանի աշխատանքներին նվիրված խորհրդակցություն:
ԼՂՀ կառավարությունում կայացել է գարնանացանի աշխատանքներին նվիրված խորհրդակցություն
ԼՂՀ վարչապետ Արա Հարությունյանն ապրիլի 1-ին հրավիրել է աղբահանության և գարնանացանի աշխատանքներին նվիրված խորհրդակցություն:
Ինչպես «Արցախպրես»-ին տեղեկացրին ԼՂՀ կառավարության տեղեկատվության և հասարակայնության հետ կապերի բաժնից, կառավարության ղեկավարը հանձնարարել է ապրիլի 7-ից մայիսի 9-ը շաբաթօրյակների շարք սկսել ողջ հանրապետությունում՝ մաքրելու և բարեկարգելու թե՛ հանրապետական ու միջհամայնքային նշանակության ճանապարհները, թե՛ քաղաքների փողոցները և թե՛ զբոսաշրջային այցելությունների վայրերը: Նա հորդորել է շրջանների վարչակազմերի ղեկավարներին և խորհրդակցության մյուս ներկաներին անձամբ մասնակցել շաբաթօրյակներին և օրինակ ծառայել քաղաքացիներին:
Արա Հարությունյանը տեղեկացրել է, որ կառավարությունն առավելագույն աջակցություն է ցուցաբերելու նյութատեխնիկական միջոցների տրամադրմամբ, իսկ պատասխանատու մարմինները պետք է այդ աշխատանքներում հնարավորինս ընդգրկեն երիտասարդությանը, դպրոցականներին և աշխատանքային կոլեկտիվներին: Վարչապետը նաև հանձնարարել է շաբաթօրյակները դարձնել պարբերական՝ չսահմանափակվելով միայն նշյալ մեկամսյակով: Նրա խոսքով՝ անհրաժեշտ է մաքրման միջոցառումներին զուգահեռ անցկացնել նաև բացատրական աշխատանքներ՝ կանխարգելելու համար միջավայրի հետագա աղտոտումը:
Խորհրդակցության ժամանակ գյուղատնտեսության նախարար Անդրանիկ Խաչատրյանը տեղեկացրել է, որ մարտի 30-31-ին գրանցված օդի ջերմաստիճանի կտրուկ անկումը նշանակալի վնաս չի հասցրել հանրապետության գյուղատնտեսությանը: Հիմնականում տուժել են դեղձի և ծիրանի ծառերը, իսկ հացահատիկային մշակաբույսերի համար տեղումները բարենպաստ են եղել: Գյուղի և գյուղատնտեսության աջակցության հիմնադրամի գործադիր տնօրեն Աշոտ Բախշիյանը զեկուցել է, որ գարնանացան սերմացուների, պարարտանյութերի ու թունաքիմիկատների պահանջվող ծավալները առկա են, և դրանց բաշխման գործընթացն ընթանում է իր հունով: Անդրադառնալով մեքենատրակտորային պարկի՝ գյուղատնտեսական աշխատանքներին պատրաստվածությանը՝ նա նշել է, որ վերջերս ներկրված 40 բելառուսական տրակտորներն արդեն իրացվել են, և շուրջ 40 հատի պահանջարկ ևս կա:
Վարչապետ Հարությունյանի հանձնարարությամբ՝ հիմնադրամը կսկսի գյուղտեխնիկայի սարքավորումների ձեռքբերման համար տրվող արտոնյալ վարկերի տրամադրման ծրագիր՝ խուսափելու համար աշխատանքների տեխնիկական խափանումներից: