ԱՀ մշակույթի, երիտասարդության հարցերի և զբոսաշրջության, առողջապահության նախարարությունների և «Առաջ Արցախ» երիտասարդական հասարակական կազմակերպության համատեղ նախաձեռնությամբ «Առողջ ապրելակերպ» ծրագրի շրջանակներում Հադրութում կազմակերպվել են «Bubble Football» խաղ և դասախոսություն` «Թմրանյութերի և ծխախոտի վատ ազդեցությունը մարդու օրգանիզմի վրա» խորագրով:
Հադրութում կազմակերպվել է «Թմրանյութերի և ծխախոտի վատ ազդեցությունը մարդու օրգանիզմի վրա» խորագրով միջոցառում
ՍՏԵՓԱՆԱԿԵՐՏ, փետրվարի 7, ԱՐՑԱԽՊՐԵՍ: «Արցախպրես»-ի թղթակցի հետ զրույցում Հադրութի շրջվարչակազմի աշխատակազմի մշակույթի և երիտասարդության հարցերի բաժնի վարիչ Երազիկ Հայրիյանն ասել է, որ դասախոսությունը ներկայացրել է Հադրութի ԱՀ վաստակավոր բժիշկ Համո Բաբայանը:
Մեր զրուցակցի խոսքով՝ դասախոսությանը ներկա էր ավելի քան 60 երիտասարդ:
«Երիտասարդության շրջանում անհրաժեշտ է բարձրացնել օրգանիզմի վրա թմրանյութերի և ծխախոտի վնասակար ազդեցության մասին տեղեկացվածության մակարդակը: Թմրանյութերը, ինչպես նաև ոգելից խմիչքները կախվածություն են առաջացնում մարդկանց մոտ՝ վնասելով նրանց առողջությունը»,-ասել է Ե. Հայրիյանը:
«Առաջ Արցախ» երիտասարդական հասարակական կազմակերպության նախագահ Արթուր Հայրապետյանն էլ խոսելով «Bubble Football» խաղի մասին նշել է, որ դրա նպատակը առողջ ապրելակերպ քարոզելն է:
««Bubble Football» սպրտաձևը մեծ ճանաչում ունի Եվրոպայում.այն վերջերս էլ տարածվել է նաև Արցախում: Սպորտաձն ունի 3 կարևոր պայման. նախ՝ անվտանգ է, երկրորդ՝ շարժում է մարդու մարմնի մկանները և երրորդ՝ զվարճալի սպորտային խաղ է»,-հավելել է Ա. Հայրապետյանը:
