Մարտունու շրջանում գարնանացան մշակաբույսերի հերկի տակ 2414,4 հա ցանքս է կատարվել, նախորդ տարվա նույն ժամանակահատվածի 2095 հա-ի փոխարեն. գարնանացան աշխատանքները դեռևս շարունակվում են:
Մարտունու շրջանում այս տարվա գարնանացանը գերազանցում է նախորդ տարվա ցուցանիշը
ՍՏԵՓԱՆԱԿԵՐՏ, մայիսի 22, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Մարտունու շրջանի աշխատակազմի գյուղատնտեսության, հողաշինարարության և հողօգտագործման բաժնի վարիչ Ռոբերտ Վանյանը:
Նա նշել է, որ կատարված ցանքսից, մասնավորապես հասկավոր հացահատիկների 31 հա-ը կազմում են ցորենի, 53,9 հա-ը՝ գարու, 52,5-ը՝ հաճարի, 235-ը՝ եգիպտացորենի, 224-ը՝ հնդկացորենի, 53,2-ը՝ արևածաղկի, 170-ը՝ հլածուկի, 22,4-ը՝ սոյայի, 1261,3-ը՝ կտավատի ցանքսերը:
Խոսելով ընդեղեն մշակաբույսերի ցանքսի ցուցանիշների մասին՝ Ռ. Վանյանն նաև ասել է, որ սիսեռը կազմում է 24,1 հա, ոլոռը՝ 45, լոբին՝ 10,8:
Մեր զրուցակցի խոսքով՝ ընթացքի մեջ են նաև բանջարաբոստանային մշակաբույսերի և ծխախոտի ցանքսի աշխատանքները: Արդեն իսկ, տնկվել են 18 հա ծխախոտի սածիլներ. նախատեսվում է այդ ցուցանիշը հասցնել 106,28 հա-ի. դրանցից 50 հա-ը ոռոգվելու է կաթիլային համակարգով: Բանջարաբոսատանային մշակաբույսերի ցանքատարածությունը ներկայումս կազմում է 15,7 հա, որից՝ 49,6 հա սոխ, 27,7 հա սխտոր, 86,2 հա կարտոֆիլ և 2 հա էլ ձմերուկ:
