Գրիգոր Նարեկացի համալսարանում տեղի է ունեցել մանկագիր Մարսել Պետրոսյանին նվիրված միջոցառում
Գրիգոր Նարեկացի համալսարանի ամերիկահայ Լուտովիկա և Հակոբ Այնթափլյանների անվան արևմտահայերենի, հայագիտության գիտահետազոտական կենտրոնում այսօր տեղի է ունեցել մանկագիր, արձակագիր, լրագրող, արցախյան շարժման ակտիվիստ, հասարակական գործիչ Մարսել Պետրոսյանի 70-ամյակին նվիրված միջոցառումը:
Գրիգոր Նարեկացի համալսարանում տեղի է ունեցել մանկագիր Մարսել Պետրոսյանին նվիրված միջոցառում
ՍՏԵՓԱՆԱԿԵՐՏ, հոկտեմբերի 19, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով՝ հանդես է եկել ԱՀ գրողների միության նախագահ Վարդան Հակոբյանը:
Նա, շնորհավորելով հոբելյարի 70-ամյակը, նշել է, որ ինքը մեծ հաճույքով է ընթերցում Մ. Պետրոսյանի մանկական ստեղծագործությունները: Նրա ստեղծագործություններից պարզ երևում է, որ ինքը լավ է հասկանում մանուկների աշխարհը:
«Տարիների ընթացքում ես նկատեցի, որ մանկական արձակի մեջ Մ. Պետրոսյանն իր ուրույն տեղն է գտել: Հեղինակը տարիների ընթացքում հրատարակել է յոթ հեքիաթների և պատմվածքների ժողովածու: Վերջերս հրատարակվել է նաև «Վարուժանը, տատիկը և պատերազմը» գիրքը, որտեղ նա պատմում է արցախյան պատերազմի մասին»,-մասնավորապես ասել է Վ. Հակոբյանը:
Բանաստեղծ Արկադի Թովմասյանի խոսքով էլ Մարսել Պետրոսյանն արցախյան պայքարի առաջամարտտիկ եղել է դեռևս այն ժամանակ, երբ դեռ պատերազմ չկար:
«Ընթերցելով նրա կենսագրությունը նկատում ենք, որ ամենուր Մ. Պետրոսյանը եղել է գաղափարի առաջամարտիկ: Նրա ամեն մի ստեղծագործությունում նոր ասելիք կա: Նա չի կրկնում ոչ ինքն իրենք և ոչ էլ ուրիշներին»,-նշել է Ա. Թովմասյանը:
ԱՀ ժուռնալիստների միության նախագահ Կիմ Գաբրիելյանն ասել է, որ մանկական աշխարհը Մ. Պետրոսյանի տարերքն է: Նա ունի հարուստ բառապաշար և ինքնուրույն ոճ: Նա զարմանալիորեն կարողանում է համադրել յուրաքանչյուր բառ ու միտք:
Իսկ Մ. Պետրոսյանը, խոսելով իր մասին, մասնավորապես ասել է. «Որպես լրագրող՝ ես երկար տարիներ հանրային ռադիոյում աշխատել եմ հայ մեծ մանկագիր Գուրգեն Գաբրիելյանի հետ: Գրական փորձերս սկսել եմ հենց այդ տարիներին:Իմ առաջին ստեղծագործության վերնագիրն է «Հայրիկի հրաշքը»: Ստեղծագործություններիս հերոսները եղել են իմ երեխաները, թոռները: Երեխաների մասին և նրանց համար որևէ բան գրելիս ես հաճույք եմ ստանում: Որպես ձևավորված անհատականություն, քաղաքացի, լրագրող, մանկագիր ես ձևավորվել եմ հանրային ռադիոյում աշխատելու տարիներին: Առաջին գիրքս տպագրել եմ արցախյան պատերազմի թեժ տարիներին՝ 1992 թվականին: Ես իմ գրքով մերժել և «ոչ» եմ ասել պատերազմին: Գալիք տարում տպագրության եմ պատրաստում ավելի ծավալուն աշխատանք, որը կլինի դետեկտիվ ժանրի ստեղծագործություն»:
Միջոցառմանը ներկա էին ԱՀ գրողների միության անդամներ, լրագրողներ, դասախոսներ, ուսանողներ և այլք: