Այսօր՝ նոյեմբերի 2-ին, Ստեփանակերտում շարունակվել են հաշվապահական և հարկային հաշվառման թեմաներով նախօրեին մեկնարկած սեմինար-դասընթացները:
Ստեփանակերտում կազմակերպվել են հաշվապահական դասընթացներ
ՍՏԵՓԱՆԱԿԵՐՏ, 2 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ ֆինանսների նախարարության հարկային վարչարարության մեթոդաբանության և հարկ վճարողների իրազեկման բաժնի պետ Արմինե Մուսայելյանն ասել է, որ այս տարվա օգոստոս ամսից ֆինանսների նախարարության և ՀՀ Հաշվապահների ու աուդիտորների ասոցիացիայի հետ համատեղ նախաձեռնվել են հաշվապահների ուսուցման դասընթացներ:
«Առաջին փուլում ընդգրկվել են շինարարության և հանքարդյունահանման ոլորտում գործող հաշվապահները, իսկ արդեն երկրորդ փուլում՝ արտադրության ոլորտի, պետական փայամասնակցությամբ ընկերությունների շուրջ 70 հաշվապահներ: Սեմինարների ընդհանուր նպատակն է բարձրացնել հաշվապահների մասնագիտական գիտելիքները կոնկրետ հաշվապահության բնագավառում: Այստեղ մենք ունենք որոշակի բացեր, և այս փուլում ներկայացվում է հաշվապահական հաշվառման քաղաքականության ընտրության, սխալների կատարման դեպքում դրանց ուղղումների, ինչպես նաև ֆինանսական ակտիվների, պարտավորությունների, այդ թվում դեբետորական և կրեդիտորական հաշվառման հետ կապված, վարկերի, փոխառությունների ինչպես հաշվապահական, այնպես էլ հարկային հաշվառման խնդիրները: Քանի որ գործնականում սխալները հիմնականում թույլ են տրվում շատ դեպքերում հաշվապահների չիմացության, ոչ բավարար գիտելիքների պատճառով, այդ նպատակով մեր գերակա խնդիրը հաշվապահների ուսուցման կազմակերպումն է»,- մանրամասնել է Ա. Մուսայելյանը:
Բանախոս, ՀՀ Հաշվապահների և աուդիտորների ասոցիացիայի նախագահ, «ՓԻ-ԷՅՋ-ՓԻ ՓԱՐԹՆԸՐԶ» ընկերության գործընկեր Հովհաննես Պետրոսյանն էլ նշել է, որ Արցախում սա երկրորդ հանդիպումն է բիզնես կազմակերպությունների, ֆինանսական, հաշվապահական համակարգի աշխատողների հետ:«Նմանատիպ դասընթացներ մենք կազմակերպել էինք նաև հանրային ոլորտում աշխատող հաշվապահների համար: Երկօրյա սեմինարով անհնարին է ամբողջ նորությունները, փոփոխությունները ներկայացնել: Սա պետք է շարունակական լինի: Մենք հաշվապահներին ներկայացնում ենք ֆինանսական հաշվետվությունների միջազգային ստանդարտները: Դրանք այն նորմատիվ ակտերն են, որոնցով կազմակերպությունները պատրաստում և ներկայացնում են ֆինանսական հաշվետվությունները: Դա անհրաժեշտ է կազմակերպության ֆինանսական վիճակը գնահատելու համար: Սա հատկապես կարևոր է այն ընկերությունների համար, ովքեր մտնում են հարաբերությունների մեջ արտաքին մասով՝ այսինքն ցանկանում են վարկեր ներգրավել, պարտատոմսեր, բաժնետոմսեր թողարկել: Ընդհանրապես ֆինանսական հաշվետվությունների նպատակը օգտակար տեղեկատվության տրամադրումն է կազմակերպության ֆինանսական վիճակի, գործունեության արդյունքների վերաբերյալ»,- ավելացրել է Հ. Պետրոսյանը:
Դասընթացի մասնակից, «Ղուկաս քորփորեյշն» ՓԲԸ տնօրեն Արարատ Ղուկասյանն էլ ասել է, որ նման միջոցառումների անցկացումը ողջունելի է, քանի որ հաշվապահների համար բացահայտվում և կիրառվում է նոր ոլորտ, որը կապված է միջազգային ստանդարտների ներդաշնակեցման հետ:«Հաշվապահները կարող են ցանկացած դեպքում ստանդարտը հասկանալ ավելի լայն մասշտաբով: Յուրաքանչյուր հաշվապահ կարող է ինքնուրույն կիրառել ցանկացած միջազգային ստանդարտ, և այդ կիրառելիության աստիճանը, դրական կամ բացասական ցուցանիշները կախված են հենց հաշվապահի գիտելիքների մակարդակից, որը միանշանակ կարևոր է մեզ համար»,- նշել է Ա. Ղուկասյանը:
