Այսօր՝ նոյեմբերի 15-ին, Ստեփանակերտ, Արմավիր և Սանկտ-Պետերբուրգ քաղաքների դպրոցականների միջև հաստատվել է հեռուստակամուրջ:
Ստեփանակերտ, Արմավիր և Սանկտ-Պետերբուրգ քաղաքների դպրոցականների միջև տեսակապ է հաստատվել
ՍՏԵՓԱՆԱԿԵՐՏ, 15 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ծրագրի շրջանակներում երեք դպրոցների երեխաները տեսակապի միջոցով ծանոթացել են միմյանց հետ, պատմել իրենց դպրոցական կյանքի, առօրյայի մասին:
Իր խոսքում Արցախում ծրագրի համակարգող, Ստեփանակերտի Ալեքսանդր Գրիբոյեդովի անվան թիվ 3 ռուսական թեքումով միջնակարգ դպրոցի ռուսաց լեզվի ուսուցչուհի Ստելլա Պողոսյանն ասել է, որ այս օրերին Ռուսաստանի Դաշնությունում անց են կացվում հայկական մշակույթի օրեր, և այդ ծրագրի շրջանակներում էլ այսօր Արցախի, Հայաստանի և Ռուսաստանի միջև կայացել է տեսակապ:
«Հեռուստակամուրջին մասնակցում են մեր դպրոցի 8-րդ, 9-րդ և 10-րդ դասարանների աշակերտները: Նման միջոցառում կազմակերպվում է առաջին անգամ: Արդյունքում ծրագրի շրջանակներում ստեղծվել է կայք, և մեր դպրոցականները պատրաստել են երկու հոլովակ դպրոցի առօրյայի և Արցախի մասին, որոնք տեղադրված են այնտեղ: Հուսով ենք, որ այսօրվա ծանոթությունը հիմք կդնի ապագա մեծ ընկերության»,- նշել է Ս. Պողոսյանը:
Նրա խոսքով՝ դպրոցականները հնարավորություն ունեն ծանոթանալու իրենց տարեկիցների հետ, պատմելու իրենց մասին, ապա նաև հարցեր ուղղելու նրանց:
«Այս ամենը նպատակ ունի նաև հաղորդակից լինելու ռուսաստանյան դպրոցներում սովորող աշակերտների առօրյային: Սա շատ հետաքրքիր գաղափար է և կարող է արդյունավետ հարթակ դառնալ բազմաթիվ աշակերտների համար: Տեսակապի ընթացքում մեր աշակերտները հանդես եկան հայկական երգերի կատարումներով՝ դրանով մեր մշակույթը ներկայացնելով իրենց ռուսաստանաբնակ ընկերներին: Ուշագրավ է նաև, որ մեր աշակերտներն իրենց հասակակիցներին արդեն հրավիրել են Արցախ»,- ավելացրել է Ս. Պողոսյանը:
