Արցախի ազատամարտիկների միությունն ամփոփել է անցնող տարին
Արցախի ազատամարտիկների միությունն ամփոփել է ընթացիկ տարում կատարած աշխատանքերը, որոնք նպատակաուղղված են եղել նորանկախ հանրապետության ստեղծման և կայացման գործում իրենց անմնացորդ ավանդը բերած պատերազմի մասնակիցների համախմբմանն ու հայոց պետականակերտման ուղղությամբ վերջիններիս կատարածի արժանավայել գնահատմանը:
Արցախի ազատամարտիկների միությունն ամփոփել է անցնող տարին
ՍՏԵՓԱՆԱԿԵՐՏ, 24 դեկտեմբերի, ԱՐՑԱԽՊՐԵՍ: Այս մասին «Արցախպրես»-ին տեղեկացրին Արցախի ազատամարտիկների միությունից(ԱԱՄ)՝ մանրամասնելով, որ անցնող տարվա ընթացքում, Միության վարչության կողմից հաստատված աշխատանքային պլանի շրջանակում, կյանքի են կոչվել համապետական ու տեղային նշանակության բազմաթիվ ծրագրեր: Առանձնահատուկ ուշադրություն է դարձվել պետականաշինության տարբեր ոլորտներում կազմակերպության անդամների ակտիվ ներգրավմանը:
Նրանց մասնակցությամբ բանակային ստորաբաժանումներում և հանրակրթական ուսումնական հաստատություններում իրականացվել են ռազմահայրենասիրական կարևորության տարաբնույթ միջոցառումներ: Միայն Միության տարածքային և համայնքային միավորումներում նմանօրինակ միջոցառումներ կազմակերպելու համար ծախսվել է 4 միլիոն 380 հազար դրամ:
Աղբյուրի հաղորդմամբ՝ այս և մյուս գործընթացներին զուգահեռ՝ Միության գործունեության առաջնահերթ ուղղություններից մեկը շարունակել է մնալ պատերազմի մասնակիցների արժանապատիվ կենսագործունեության ապահովումը, ինչն արտահայտվել է նյութական ու բարոյական օժանդակությամբ:
Մասնավորապես՝ 2018թ.-ի ընթացքում բուժման նպատակով 860 ազատամարտիկի ցուցաբերվել է 66 միլիոն 320 հազար դրամ ֆինանսական օժանդակություն, Միության միջնորդությունների արդյունքում իրականացվել են 41 ազատամարտիկների անվճար բուժումներ ԱՀ ՊՆ-ի զինվորական հոսպիտալում: Արցախյան գոյամարտի 1-ին և 2-րդ կարգի 987 հաշմանդամներ ստացել են 49 միլիոն 310 հազար դրամ:
Նշանակալի աշխատանք է կատարվել նաև ազատամարտիկների սոցիալ-կենցաղային պայմանների բարելավման ուղղությամբ: ԱԱՄ մի շարք անդամների բնակարանները նորոգելու համար Միության վարչության որոշմամբ ձեռք է բերվել և հատկացվել 26 միլիոն 237 հազար դրամ արժողությամբ շինանյութ:
Զուգահեռ այս ամենին՝ անհատական հանդիպումների միջոցով ներկայացվել և պաշտպանվել են ԱԱՄ տասնյակ անդամների իրավունքներն ու օրինական շահերը դատարաններում, տեղական ինքնակառավարման մարմիններում և այլն:
Արցախի Հանրապետության Նախագահի հրամանագրով տարվա ընթացքում պարգևատրվել են ԱԱՄ 369 անդամներն են, որոնցից 365-ը արժանացել է «Մարտական ծառայություն», իսկ 4-ը՝ «Շուշիի ազատագրման համար» մեդալների: Արցախի ազատամարտիկների միության վարչության որոշմամբ՝ 162 ազատամարտիկներ պարգևատրվել են «Հայրենյաց պաշտպան» մեդալով, 171-ը՝ Միության պատվոգրով, 43-ը՝ արժեքավոր նվերներով (2 միլիոն 352 հազար դրամ գումարի չափով), 18-ն արժանացել է դրամական խրախուսանքի:
Առանձնահատուկ հիշատակման է արժանի Արցախի հանրային ոլորտում Միության կողմից ծավալած հայրենանվեր գործունեությունը: Թերևս այս ուղղությամբ ձեռնարկված ամենախոշոր ծրագիրը Ստեփանակերտի Ազատամարտիկների անվան պուրակի կառուցապատումն է, որի ավարտական փուլի համար ընթացիկ տարում Միության բյուջեից ծախսվել է 301 միլիոն 473 հազար դրամ:
Միությունը հաշվետու ժամանակաշրջանում շարունակել է մշտական սերտ կապ ապահովել ԱՀ պետական կառույցների և հասարակական կազմակերպությունների հետ: ԱԱՄ կողմից 7միլիոն 386 հազար դրամ հատկացվել է ԱՀ Պաշտպանության բանակին, 1միլիոն 500 հազար դրամ՝ Հայ Առաքելական եկեղեցուն, 300 հազար դրամ՝ «Մայրություն» ՀԿ-ին, 2 միլիոն դրամ՝ Առաջաձոր համայնքի հուշարձանի կառուցմանը, 400 հազար դրամ՝ Ազոխ համայնքի դպրոցին, 200 հազարական դրամ՝ Բերդաշենի հուշարձանի նորոգմանը, Վանք համայնքի դպրոցին և Նորագյուղ համայնքի ԱԱՄ գրասենյակի կահավորմանը:
Հավելենք, որ Արցախի ազատամարտիկների միության կողմից Ստեփանակերտի «Մոր և մանկան առողջության կենտրոնին», Քաշաթաղի շրջանի մի շարք մանկապարտեզների, դպրոցների հատկացվել են համապատասխան իրեր և խաղալիքներ, իսկ ազատամարտիկներին՝ հագուստ: Կանանց միամսյակին նվիրված միջոցառումների շրջանակում միության երիտասարդական թևի միջոցով գեղեցիկ սեռի ներկայացուցիչներին մայրաքաղաքում բաժանվել են վարդեր:
Միության ֆինանսավորմամբ գործում է «Կարատե-դո» մարզական խմբակ, որտեղ անվճար պարապմունքներ են անցկացնում մոտ 25 երեխաներ: Ուրախությամբ պետք է արձանագրել,որ այդ մարզական խմբակի անդամներից ոմանք արդեն հաղթող են ճանաչվել համահայկական տարբեր մրցույթներում և այսօր էլ շարունակում են վայելել Արցախի ազատամարտիկների միության վարչության հատուկ ուշադրությունը:
Ամփոփելով ԱԱՄ 2018 թվական ընթացքում կատարած աշխատանքների արդյունքները՝ կարելի է միանշանակ արձանագրել, որ տարվա կտրվածքով նախատեսված բոլոր միջոցառումները կյանքի են կոչվել լիարժեքորեն: