ՍՏԵՓԱՆԱԿԵՐՏ, 27 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նիստին հանձնաժողովի նախագահ Հակոբ Ղահրամանյանը տեղեկատվություն է ներկայացրել ընթացիկ տարում կատարված աշխատանքների մասին:

Հ. Ղահրամանյանն ասել է, որ ԱՀ  ՀԾՏՄԿՊՀ-ին  առնչվող տարեկան բոլոր ծրագրերը, շնորհիվ համակարգված ու արդյունավետ աշխատանքի, հաջողությամբ կյանքի են կոչվել:

 

«2018 թվականի ընթացքում էներգետիկայի բնագավառում 4 ընկերությունների տրամադրվել է փոքր հիդրոէլեկտրակայաններում էլեկտրական էներգիայի արտադրության 5, իսկ 11 ընկերությունների էլ կառուցման 11 լիցենզիաներ: Հանձնաժողովը տարվա ընթացքում ամենշաբաթյա դիտանցումներով առավել խիստ վերահսկողություն է իրականացրել գերիշխող ապրանքային շուկաներում՝ հակամրցակցային գործողությունների, գների անհիմն բարձրացումների կանխարգելման նպատակով: Ընթացիկ տարվա հունվար-դեկտեմբերին ուսումնասիրված 43 ապրանքային շուկաներում առկա 80 ապրանքատեսակներից  միջին գների անկում է արձանագրվել 28, գնաճ՝ 13 ապրանքատեսակների համար: Մնացած 39 ապրանքատեսակների միջին գները մնացել են անփոփոխ կամ տատանվել են 2%-ի միջակայքում: Ուսումնասիրվող ապրանքատեսակների բոլոր փոփոխությունները դիտարկվել են օրենքի տառին համապատասխան ու տրվել գնահատականներ: Իրականացվել է ապրանքային շուկաների կառուցվածքի ուսումնասիրություն, որի արդյունքում նվազել է գերիշխող դիրք ունեցող տնտեսավարող սուբյեկտների քանակը: Դա ցույց է տալիս, որ շուկայում առկա է մրցակցություն, և այն ավելի է ազատականացվել, ինչն էլ իր ազդեցություն է թողել գնագոյացման քաղաքականության վրա: 2018 թվականի ընթացքում տնտեսական մրցակցության պաշտպանության բնագավառում իրականացրած գնագոյացման և ապրանքային շուկաների կառուցվածքի 116 ուսումնասիրությունների և շաբաթական դիտանցումների արդյունքում բացառվել է գերիշխող դիրքի չարաշահման, մասնավորապես, չհիմնավորված գների կիրառման դեպքեր»,-ասել է հանձնաժողովի նախագահը:

 

Նա նշել է, որ ՀՀ գործընկեր Հանձնաժողովների հետ իրականացվել են նախընտրական քարոզարշավին վերաբերող հեռուստահաղորդումների մոնիթորինգ և իրականացվել ինստիտուցիոնալ համագործակցություն տարբեր բնագավառներում: Հանձնաժողովը սերտ համագործակցության մեջ է գտնվել ՀՀ գործընկեր հանձնաժողովների հետ և մասնակցել է տարբեր քննարկումների  ու միջազգային սեմինարների:

 

Հ. Ղահրամանյանի հաղորդմամբ՝ 2018 թվականին հանձնաժողովն անց է կացրել 18 նիստ և  28 խորհրդակցություն: Նիստերում քննարկվել են 90 հարց, որից ընդունվել են 79 որոշումներ:

«Ստացվել են տարբեր բովանդակության 1800 գրություն, որից 11 դիմում-բողոք, մեկնաբանություն: Բոլոր  հարցերը   քննարկվել են և տրվել համապատասխան լուծումներ: Տարվա ընթացքում անց են կացվել հանդիպումներ և բազմաբովանդակ քննարկումներ ԱՀ Ազգային ժողովի պատգամավորների, հասարակական կազմակերպությունների ու զանգվածային լրատվամիջոցների ներկայացուցիչների հետ»,-մասնավորապես ասել  է Հ. Ղահրամանյանը և հավելել, որ հանձնաժողովը 2019 թվականի տարեկան գործունեության ծրագիրն արդեն իսկ հրապարակել է ԱՀ  Ազգային Ժողովում:

Նիստին հանձնաժողովը հաստատել է հանրային ծառայությունների կարգավորման պարտադիր վճար վճարողների 2019 թվականի անվանական կազմը և կարգավորման պարտադիր վճարների տարեկան դրույքաչափերը: Փոփոխություն է կատարվել Լեռնային Ղարաբաղի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի 2014 թվականի հունվարի 30-ի N1Ա որոշման մեջ:

Մեկ այլ որոշմամբ էլ հանձնաժողովը հաստատել է «Ղարաբաղ Տելեկոմ» փակ բաժնետիրական ընկերության կողմից մատուցվող կարգավորման ենթակա հանրային էլեկտրոնային հաղորդակցության ծառայությունների առավելագույն սակագներից ցածր սակագների կիրառման կարգը: Հանձնաժողովի որոշմամբ՝ դադարեցվել է ՀԾՏՄԿՊՀ-ի 2012 թվականի մարտի 5-ի N 28Ա որոշմամբ «Ջրամատակարարում և ջրահեռացում» փակ բաժնետիրական ընկերությանը տրամադրված ջրային համակարգի օգտագործման N 0001 թույլտվությունը: Փոփոխություններ են կատարվել ԼՂՀ հանձնաժողովի 2018 թվականի մարտի 5-ի N 9-Ա, ապրիլի 26-ի N15-Ա, մայիսի 18-ի N 27-Ա որոշումների մեջ:

 

Նիստի վերջում  Հակոբ Ղահրամանյանը պատասխանել է լրագրողների հարցերին և շնորհավորել ներկաների գալիք Ամանորն ու Սուրբ Ծնունդը՝ մաղթելով համերաշխություն, առողջություն, հաջողություն և երջանկություն: