Մինչեւ ապրիլի 24-ը հայ-թուրքական արձանագրությունները պետք է իրենց ավարտին մոտենան նաեւ դե յուրե, այսինքն՝ հետ կանչվեն։
Մինչեւ ապրիլի 24-ը հետ կանչել հայ-թուրքական արձանագրությունները. Թուրքագետ
ՍՏԵՓԱՆԱԿԵՐՏ, 3 ՓԵՏՐՎԱՐԻ, ԱՐՑԱԽՊՐԵՍ։ Այս մասին փետրվարի 3-ին մամուլի ասուլիսի ժամանակ հայտարարեց ԵՊՀ Արեւելագիտության ֆակուլտետի փոխդեկան թուրքագետ Ռուբեն Մելքոնյանը։
Նա վստահություն հայտնեց, որ մինչեւ վերոնշյալ ժամկետը Հայաստանի կողմից համապատասխան քայլ կձեռնարկվի։ Անդրադառնալով այն հարցին, թե չկան արդյոք հակասություններ արձանագրությունների եւ Հայոց ցեղասպանության 100-ամյակի կապակցությամբ օրերս հրապարակված Համահայկական հռչակագրի միջեւ, Մելքոնյանը նշեց, որ երկու փաստաթղթերը միմյանց չեն հակասում։
«Արձանագրություններում ասված էր Հայաստանի եւ Թուրքիայի միջեւ այսօրվա սահմանի մասին։ Եթե Հայաստանը ստորագրել է այդ փաստաթուղթը, դա չի նշանակում, թե արձանագրություններից դուրս նա բացառում է տարածքային պահանջները։ Չեմ կարծում, թե հայ-թուրքական արձանագրությունների այդ կետը զրկում է մեզ պահանջատեր լինելու մեր հնարավորությունից»,- նշել է թուրքագետը։
Հիշեցնենք, որ հայ-թուրքական հարաբերությունների բարելավման գործընթացը սկսվեց 2008 թվականի աշնանը ՀՀ նախագահ Սերժ Սարգսյանի նախաձեռնությամբ: 2009-ի հոկտեմբերի 10-ին Հայաստանի եւ Թուրքիայի ԱԳ նախարարներ Էդվարդ Նալբանդյանն ու Ահմեդ Դավութօղլուն Ցյուրիխում «Դիվանագիտական հարաբերությունների մասին արձանագրություն» եւ «Երկկողմ հարաբերությունների զարգացման մասին արձանագրություն» ստորագրեցին, որոնք պետք է վավերացվեին երկու երկրների խորհրդարանների կողմից:
Սակայն արդեն 2009 թվականի դեկտեմբերին Թուրքիայի վարչապետ Ռեջեփ Թայիփ Էրդողանը հայտարարեց, որ Անկարան արձանագրությունները չի վավերացնի՝ առանց ղարաբաղյան հակամարտության կարգավորման: 2010 թվականի ապրիլի 22-ին Սերժ Սարգսյանը հայտարարեց հայ-թուրքական արձանագրությունների վավերացման գործընթացը կանգնեցնելու մասին՝ փաստելով, որ Թուրքիան պատրաստ չէ շարունակել սկսված գործընթացը: Փաստաթղթերի վավերացման գործընթացը Թուրքիայի խորհրդարանում նույնպես սառեցված է: