Սոցիալական և հումանիտար խնդիրները քաղաքական դաշտ տեղափոխելն անընդունելի է։ Այս մասին «Ֆեյսբուք»-ի իր էջում գրել է ԱԺ ՀՀԿ խմբակցության անդամ, ԵԽԽՎ հայաստանյան պատվիրակության անդամ Նաիրա Կարապետյանը՝ անդրադառնալով ԵԽԽՎ սոցիալական հանձնաժողովի ընդունած հակահայկական զեկույցին, որը վերաբերում է Սարսանգի ջրամբարին:
Սարսանգի ջրամբարի վերաբերյալ զեկույցում օգտագործվում է քաղաքական անընդունելի բառապաշար. Նաիրա Կարապետյան
ՍՏԵՓԱՆԱԿԵՐՏ, նոյեմբերի 24, ԱՐՑԱԽՊՐԵՍ-ԱՐՄԵՆՊՐԵՍ։ «Սա աննախադեպ իրավիճակ է, երբ ԵԽԽՎ ձևաչափով պատրաստվում են զեկույցներ՝ առանց զեկույցի խնդրո թեմա հանդիսացող վայր այցելելու, առանց փաստերին ծանոթանալու, առանց հաշվի առնելու հենց ԵԽԽՎ կողմից հրավիրված տեխնիկական մասնագետի պնդումները, որ տեղում կատարած ուսումնասիրություններն ավելի ծանրակշիռ կդարձնեն փաստաթղթերը։
Հայկական կողմի փաստարկված առաջարկը՝ հարցի քննարկումը հետաձգելու մինչ Սարսանգ այցելելն ու տեղում խնդրին ծանոթանալը զեկուցողի կողմից մերժվեց։ Հայաստանը կներկայացնի հատուկ կարծիք, որը կկցվի փաստաթղթին»,- գրել է պատգամավորը։
«ԵԽԽՎ ձևաչափում աննախադեպ խայտառակ երևույթ է տեղի ունենումն: Սարսանգի ջրամբարի վերաբերյալ զեկույցում օգտագործվում է քաղաքական բառապաշար, ինչը մեզ համար անընդունելի է»,- ավելի վաղ «Արմենպրես»-ի հետ զրույցում ասել էր Նաիրա Կարապետյանը:
ԵԽԽՎ սոցիալական հարցերի հանձնաժողովը 9 դեմ, 16 կողմ ձայների հարաբերակցությամբ ընդունել է Սարսանգի ջարամբարի վերաբերալ հակահայկական զեկույցը: Հանձնաժողովի նիստին հայկական պատվիրակությունից մասնակցել են Վահան Բաբայանը և Նաիրա Կարապետյանը: ԵԽԽՎ-ն ընդունել է բոսնիացի պատգամավոր Միլիցա Մարկովիչի՝ խիստ կողմնակալ և քաղաքական բառապաշարով զեկույցը: Զեկույցը կրում է «Ադրբեջանի սահմանամերձ շրջանների բնակիչները միտումնավոր զրկված են ջրից» խորագիրը: