Անցյալ տարի ԼՂՀ արդյունաբերական արտադրանքի տարեկան ծավալը կազմել է 53,3 մլրդ դրամ` նախորդ տարվա համեմատ արձանագրելով 2% աճ:
Արցախում ավելի քան 5 անգամ աճել է մակարոնեղենի արտադրությունը
ՍՏԵՓԱՆԱԿԵՐՏ, փետրվարի 9, ԱՐՑԱԽՊՐԵՍ: «Արցախպրես»-ի հաղորդմամբ՝ այսօր կայացած մամլո ասուլիսի ժամանակ այս մասին ասել է ԼՂՀ էկոնոմիկայի նախարար Անդրանիկ Խաչատրյանը:
«Բացի այդ, ոլորտում ձևավորվել է շուրջ 330 նոր աշխատատեղ: Արդյունաբերության խթանմանը հատկապես նպաստել է մշակող արդյունաբերության աճը: Հունվար–նոյեմբեր ամիսներին այդ ոլորտի ընկերություններն արտադրել են 19 մլրդ դրամի արտադրանք` ցուցաբերելով 8 տոկոսի աճ: Հարկ է նշել պահածոների արտադրության ծավալների աճը, որը կազմել է 40 տոկոս. դրան նպաստել են ինչպես տեղական գյուղմթերքի բավարար ծավալները, այնպես էլ ոլորտում նոր արտադրական հզորությունների գործարկումը»,-ասել է էկոնոմիկայի նախարարը՝ մանրամասնելով, որ պետական մասնակցությամբ շահարկվել է ժամանակակից սարքավորումներով և տեխնոլոգիաներով հագեցած նոր պահածոների գործարան: Բացի այդ, Շուշի քաղաքում նոր արտադրամասի գործարկմամբ, ավելի քան 5 անգամ աճել է մակարոնեղենի արտադրանքը: Անցյալ տարի լրիվ հզորությամբ է աշխատել Մարտունու շրջանի Կարմիր Շուկա գյուղի բուսական յուղի գործարանը՝ արտադրելով ավելի քան 1 տ ձեթ:
Ա. Խաչատրյանի խոսքով՝ աճ է գրանցվել նաև շինանյութերի արտադրության ոլորտում. շինաքարի, խճի, ասֆալտի, մանրատախտակի արտադրության ծավալները աճել են մինչև 70 տոկոսով:
Անդրադառնալով հանքաարդյունաբերության ոլորտին՝ նախարարը նշել է, որ 2015-ին արդյունահանման ծավալները շարունակել են կրճատվել. այն կապված է Դրմբոնի հանքավայրի պաշարների նվազման հետ:
«Անցած տարվա 11 ամիսների արդյունքներով՝ անկումը կազմել է 13 տոկոս: Սակայն հաշվետու ժամանակահատվածում մեկնարկել է Կաշենի պղինձամոլիբդենային նոր հանքավայրի շահագործումը՝ տարեկան մինչև 2 մլն տ հանքաքարի արտադրությամբ»,- հավելել է Ա. Խաչատրյանը: