Ադրբեջանի փիլիսոփայության եւ իրավունքի ինստիտուտի քաղաքական տեսությունների բաժնի աշխատակից, փիլիսոփայության դոկտոր Յադիգար Թյուրքելը հեռացվել է աշխատանքից այն բանի համար, որ Ալեքսանդր Շեպոտեւի հարավկովկասյան հակամարտություններին նվիրված մի գրքի առաջաբանում նշել է, որ Հեյդար Ալիեւը 1993 թվականին իշխանության է եկել հեղաշրջման միջոցով:
Հեյդար Ալիեւը 1993 թվականին իշխանության է եկել հեղաշրջման միջոցով. փիլիսոփայության դոկտոր
ՍՏԵՓԱՆԱԿԵՐՏ, 10 մարտի, ԱՐՑԱԽՊՐԵՍ: Այս մասին meydan TV-ին պատմել է ինքը` Յադիգար Թյուրքելը: Նա գտնում է, որ ինստիտուտի տնօրեն Իլհամ Մամեդզադեն իրեն աշխատանքից ազատել է ապօրինաբար:
«Ինձ նկատմամբ կատարված ապօրինության հետ կապված մարտի 10-ին Բաքվի միջազգային մամուլի կենտրոնում ասուլիս եմ տալու: Այդ մասին դատական հայցս կքննի Բաքվի Յասամալի շրջանի դատարանը», -ասել է նա:
Շեպոտեւի գրքի առաջաբանում Թյուրքելը պնդել է, որ «1993 թվականին հեղաշրջման ճանապարհով իշխանության եկած Հեյդար Ալիեւը անտեղի կերպով փոխել է ադրբեջանցի թուրքերի անունը եւ իրականացրել կայսրության քաղաքականությունը»:
«Այո, ես նման գիրք հրատարակել եմ, եւ կարծում եմ` իրավացի եմ: Եթե այդ մասին ստեի, ապագա սերունդներն ինձ կմեղադրեին պատմությունը կեղծելու մեջ», -գրել է նա:
Յադիգար Թյուրքելը հայտնել է, որ մարտի 4-ին տնօրենը հավաքել է ինստիտուտի աշխատակիցներին եւ իրեն «ժողովրդի թշնամի» հայտարարել:
«Ավելին, բարձրացրել է իմ դոկտորական դիպլոմը հետ վերցնելու հարցը, աշխատակիցներն էլ քվեարկությամբ հաստատել են դա», -ասել է նա` նշելով, որ ինստիտուտի տնօրենը սպառնացել է Շեպոտեւի գրքում գրածների համար 12 տարվա ազատազրկման ենթարկել տալ իրեն:
Յադիգար Թյուրքելն իր հրատարակած գրքում ամբողջությամբ մերկացրել է 1992-1993 թվականներին Ադրբեջանում իշխանության փոփոխությունը, Աբուլֆազ Էլչիբեյի իշխանությունից հեռանալն ու հանրաքվեի ճանապարհով Հեյդար Ալիեւի որպես համաժողովրդական առաջնորդ իշխանության գալը, եւ իրադարձությունը գնահատել որպես պետական հեղաշրջում:
«Հեյդար Ալիեւը իշխանության է եկել ոչ թե համաժողովրդական քվեարկության, ժողովրդի վստահությունը, հարգանքը վաստակելու ճանապարհով, այլ բացառապես զինված պետական հեղաշրջման միջոցով: Խորհրդարանի նախագահ եղած ժամանակ, երկրի նախագահ դառնալուց առաջ, նա խորհրդարանում օրինագիծ է ընդունել տվել, որ Ադրբեջանը հրաժարվի թուրքականությունից եւ ադրբեջանականություն ընդունի», -գրքի առաջաբանում գրել է Յադիգար Թյուրքելը:
Ադրբեջանում խիստ հիվանդագին են ընդունում Հեյդար Ալիեւի հասցեին քննադատությունը եւ պաշտոնական քարոզչությանը հակասող փաստերի հրապարակումները:
Թուրք գրող Թուրղութ Էրին Ադրբեջւանի իշխանությունները մեղադրել են զրպարտության եւ հակաադրբեջանական գործունեության մեջ այն բանի համար, որ նա իր` «Ազատությունից բռնակալություն: Ասես վերակենդանացել են Ստալինն ու Բերիան» գրքում մերկացրել է Հեյդար Ալիեւի կառավարության երկդիմիությունը եւ ապացուցել, որ նա հաճախ գործել է իր անձնական շահերից ելնելով, եւ ոչ թե պետության եւ ժողովրդի օգտի համար:
