Այսօր «Թանգարանների գիշեր» համաեվրոպական նախագծի շրջանակներում, Արցախի պետական պատմա-երկրագիտական թանգարանում տեղի է ունեցել «Ադրբեջանի կողմից օկուպացված տարածքների պատմաճարտարապետական հուշարձանները» թեմայով ցուցահանդես:
«Թանգարանների գիշեր» նախագծի շրջանակներում՝ Ստեփանակերտում կայացել է ցուցահանդես (լուսանկարներ)
ՍՏԵՓԱՆԱԿԵՐՏ, 18 մայիսի, ԱՐՑԱԽՊՐԵՍ: Բացման խոսքում Արցախի պետական պատմա-երկրագիտական թանգարանի տնօրեն Մելանյա Բալայանը ողջունելով, ներկաներին նշել է, որ ինչպես նախորդ տարիներին, այս տարի ևս «Թանգարանների գիշեր» միջոցառմանը և թանգարանների միջազգային օրվան միացել են Հայաստանի և Արցախի 112 թանգարաններ:
Ցուցահանդեսին ներկայացված էր հայկական ճարտարապետությունն ուսումնասիրող հիմնադրամի ղեկավար, հուշարձանագետ, Սամվել Կարապետյանի կողմից 1981-1982 թվականներին արված 75 լուսանկար:
«Արցախպրես»-ի թղթակցի հետ զրույցում Մելանյա Բալայանը նշել է, որ «Թանգարանների գիշեր» համաեվրոպական միջոցառումն այս տարի ևս կհամախմբի մշակութասեր հանրությանը: Տարբեր մշակութային օջախներում այսօր՝ մայիսի 18-ին սպասվում են մի շարք միջոցառումներ, որոնց նպատակը թանգարան-այցելու կապն ամրապնդելն է, հասարակության ուշադրությունը գրավելը, մշակութային ժառանգության պահպանման գիտելիքների ու փորձի տարածումը և սերունդներին դրանց հաղորդակից դարձնելը: Հաստատության տնօրենի խոսքով թանգարանն տարբեր պետություններից ունի այցելուներ, ովքեր մշտապես փաստում են, որ պատմական այն տեղեկատվությունը, որը ստանում են այստեղ, ամբողջովին փոխում է իրենց պատկերացումը հայ ժողովրդի մասին:
«Տարվա կտրվածքով թանգարան են այցելում մոտ 19000 այցելու` աշխարհի տարբեր ծայրերից: Վերջին շրջանում մեծ թվով արտասահմանյան այցելուներ ենք ունենում: Այցելելով թանգարան, ծանոթանալով մեր իրական պատմությանը, նրանց մոտ ճշմարիտ կարծիք է ձևավորվում այն մասին, թե ինչու է հայ ժողովուրդը ստիպված եղել լքել իր հայրենիքը և հայտնվել աշխարհի տարբեր անկյուններում», -մանրամասնել է Մ. Բալայանը։
Տնօրենը կարևորել է թանգարանում ներկայացվող այն տեղեկատվությունը, որը հայ ժողովրդի ամբողջական պատմությունն է ներկայացնում։
«Հավաստիացնում եմ, որ մեր թանգարանն այսուհետ ևս կլինի լուրջ քարոզչական կենտրոն, որովհետև միայն գրքեր հրատարակելով չենք կարող մեր իրական կենսագրությունը ներկայացնել տարբեր ազգերի ներկայացուցիչներին»,-խոսքը եզրափակել է Մ. Բալայանը։
Նշենք, որ Ֆրանսիայի մշակույթի նախարարության նախաձեռնությամբ, Եվրոպայի խորհրդի և ՅՈՒՆԵՍԿՕ-ի հովանավորությամբ ամեն տարի մայիսին անց է կացվում «Թանգարանների գիշեր» համաեվրոպական միջոցառումը: Հայաստանյան թանգարաններն այս միջոցառմանը մասնակցում են 2005 թվականից:
