Այսօր՝ դեկտեմբերի 8-ին, կոռուպցիայի դեմ պայքարի միջազգային օրվա կապակցությամբ Արցախի պետական համալսարանում իրավաբանության բաժնի ուսանողների հետ հանդիպել և դասախոսությամբ հանդես է եկել ԱՀ գլխավոր դատախազ Արթուր Մոսիյանը:
Գլխավոր դատախազն ԱրՊՀ-ում խոսել է կոռուպցիայի խնդիրների մասին
ՍՏԵՓԱՆԱԿԵՐՏ, 8 դեկտեմբերի, ԱՐՑԱԽՊՐԵՍ: Այս մասին «Արցախպրես»-ին հայտնեցին ԱրՊՀ ուսանողների հետ տարվող աշխատանքների, հանրային կապերի և լրատվության բաժնից:
Աղբյուրի փոխանցմամբ՝ Ա. Մոսիյանը դասախոսություն-քննարկումը սկսել է կոռուպցիայի դեմ պայքարի միջազգային օրվա մասին նախապատմությամբ, ապա անդրադարձել նաև հանրապետության կոռուպցիոն երևույթների և ռիսկերի մակարդակին, դրանց վերահսկման մեխանիզմներին:
Ա. Մոսիյանի խոսքով՝ որքան հետևողական է պայքարը կոռուպցիոն երևույթների դեմ, այնքան մեծ է պետության և հասարակության բարոյաիրավաբանական հարաբերությունների հաշվեկշիռը:
Գլխավոր դատախազը կոռուպցիոն բնույթի հանցագործությունների վիճակագրական տվյալներ է ներկայացրել՝ ըստ տարիների, ըստ հոդվածների, ըստ համակարգերի և ոլորտների` ընդգծելով հատկապես հանցագործություն-բացահայտում հարաբերակցությունը և այդ գործում քաղաքացիական հասարակության դերակատարությունը:
«Վաղուց ժամանակն է, որ հասարակական գիտակցությունը զուգորդվի իրավապահ մարմինների գործառույթներին: Հասարակության ներգրավվածությունը օր առաջ կբերի հանցագործությունների, այդ թվում կոռուպցիոն ռիսկերի մակարդակի նվազեցմանը»,- նշել է գլխավոր դատախազը: