ՍՏԵՓԱՆԱԿԵՐՏ, օգոստոսի 1, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ներկայացնելով առաջին կիսամյակում կատարված աշխատանքների վերաբերյալ ընդհանուր Կ. Շահրամանյանը ասել է, որ 2018 թվականի պետական բյուջեի կապիտալ ներդրումների պետական պատվերի ծրագրով միայն քաղաքաշինության նախարարության մասով ոլորտին հատկացվել էր 13 մլրդ 930 մլն դրամ: «Ընթացիկ տարում այդ ծավալը ավելացվել է 530 մլն դրամով՝ ընդհանուր կազմելով 14 մլն 460 մլն դրամ: Բյուջեի ավելացումը պայմանավորված է նախորդ ամիսների ընթացքում տեղի ունեցած բնական աղետի հետևանքով հասցված վնասների վերացմանը և այլ  հրատապ լուծումներ պահանջող աշխատանքների կատարմանը»,- նշել է Կ. Շահրամանյանը:

Նրա խոսքով՝ ընթացիկ տարվա առաջին կիսամյակի  պլանը կազմում է 7 մլրդ 141 մլն դրամ, որի դիմաց սակայն իրականացվել է 8 մլրդ 706 մլն դրամի աշխատանքներ: Պլանը  գերակատարվել է՝ հաշվի առնելով հրատապ լուծում պահանջող աշխատանքներ: Սակայն նախարարը վստահեցրել է, որ ֆինանսավորումը իրականացվում է ըստ հաստատված պլանի և դրա դիմաց կառավարությունը որևէ պարտք չունի:

«Նախորդ տարվա նույն ժամանակահատվածում կապիտալ ներդրումների ծախսերի դիմաց իրականացվել է 4 մլրդ դրամի ֆիանանսավորում: Այսինքն այս տարի մոտ 3.1 մլրդ դրամի ավելի  ֆինանսավորում է իրականացրել»,-ընդգծել է Կ. Շահրամանյանը՝ հավելելով, որ հաշվետու ժամանակահատվածում՝ շինարարության բնագավառում, ապահովվել է 1 մլրդ 954 մլն դրամի հարկային մուտքեր:

Նախարարը նշել է, որ բացի պետական պատվերի ծրագրից՝ 707 մլն դրամ է հատկացվել պահուստային ֆոնդից, որից ընթացիկ տարվա առաջին կիսամյակի դրությամբ  իրականացված  աշխատանքները կազմել է 563 մլն դրամ: «Բացի այդ գույքի գնման նպատակով պահուստային ֆոնդից հատկացվել է 47 մլն դրամ՝ որոնք ուղղվել են հիմնականում հանրապետության դպրոցների, մանկապարտեզների և համայնքային կենտրոնների համար  գույքի ձեռքբերմանը և քաղպաշտպանության ոլորտում որոշակի աշխատանքների իրականացման համար հատկացվել է 83 մլն դրամ՝ սահմանամերձ բնակավայրերում ապաստարանների կառուցելու համար»,- մանրամասնել է Կ. Շահրամանյանը: