Եվոպական տարբեր կառույցներ իրենց մեջ ունեն լուրջ խնդիրներ, և նրանց իմունային համակարգը հաճախակի չի աշխատում ադրբեջանական խավիարի ու նավթի հետ հարաբերվելիս:
ԵԽԽՎ-ում Սարսանգի վերաբերյալ կողմնակալ զեկույցը ևս մեկ հարված է ժողովրդավարական արժեքներին. ԼՂՀ
ՍՏԵՓԱՆԱԿԵՐՏ, նոյեմբերի 24, ԱՐՑԱԽՊՐԵՍ-ԱՐՄԵՆՊՐԵՍ։ Արցախի Հանրապետության նախագահի մամուլի խոսնակ Դավիթ Բաբայանը նման կերպ մեկնաբանեց Եվրոպայի խորհրդի խորհրդարանական վեհաժողովի սոցիալական հանձնաժողովում Սարսանգի ջրամբարի վերաբերյալ խիստ կողմնակալ զեկույցի ընդունումը: «Այդպիսի զեկույցներ են ի հայտ գալիս, որոնք որևէ քաղաքական, իրավական կարևոր նշանակություն չունեն, բայց հսկայական բարոյական հարված են հենց ԵԽԽՎ-ին ու ժողովրդավարական արժեքներին: Այն մարդիկ, ովքեր ընդգրկված են այդ կոռուպցիոն սխեմաների մեջ, նրանք ընդհանրապես արժեքների մասին չեն մտածում` բացի փողից»,-«Արմենպրես»-ի հետ զրույցում ասաց Դավիթ Բաբայանը:
Նրա խոսքով` հայկական կողմը պետք է իր հստակ դիրքորոշումը ներկայացնի, որ բոլորի համար պարզ լինի`նման փաստաթղթերը, որոնք գնվում, վաճառվում են և պատվիրվում, որևէ էական ազդեցություն չեն ունենա հայության կամքի, հաստատակամության վրա:
Դավիթ Բաբայանը շեշտեց, որ Արցախն Ադրբեջանին բազմիցս առաջարկել է համագործակցել Սարսանգի ջրային ռեսուրսների բաշխման հարցերով, բայց պատասխանը ցույց է տվել, որ ադրբեջանական կողմը շահագրգռվածություն չունի այդ հարցում: «Մի կողմ են դրել էկոլոգիայի, գյուղատնտեսության զարգացման խնդիրները, այն, որ մարդիկ սահմանամերձ շրջաններում ջուր չունեն, ու ասում են դա դրամական առումով կազմելու է նավթի եկամուտների «զրո ամբողջ քանի հարյուրերորդական» տոկոսը: Դրա համար չեն ուզում: Բացի այդ` այսպիսի քաղաքականություն են վարում, որ էլ ավելի ատելություն սերմանեն տեղացի բնակիչների շրջանում հայության հանդեպ: Իրենք լինելով հիմնական մեղավորը, որ ջուրը չի հասնում իրենց ժողովրդին` փորձում են սեփական ժողովրդին մոլորեցնել, լարել հայության դեմ ու այսպիսի քաղաքական դիվիդենտներ շահել»,-շեշտեց Դավիթ Բաբայանը:
Անդրադառնալով հարցի նախապատմությանը` նա նշեց հետևյալը.
«Ադրբեջանցիները խորհրդային ժամանակաշրջանում վարում էին հիդրոճնշման խորը մշակված քաղաքաակնություն և այնպես էին արել, որ նախկին Լեռնային Ղարաբաղի Ինքնավար Մարզը գրեթե զրկված է եղել սեփական ջրային ռեսուրսներից օգտվելու հնարավորությունից: Նրանք ջրամբարներ էին կառուցում Արցախից սկիզբ առնող գետերի վրա նախկին ԼՂԻՄ-ի սահմանից դուրս, որ մենք դրանք չկարողանանք օգտագործել: Այն ժամանակ, եղել է սովետական համակարգ, ազգերի միջև եղբայրության գաղափարախոսություն և ասում էին` ինչու պետք է էլի ջրամբար կառուցենք, մեկը կա, տնտեսապես շահավետ է: Սարսանգը միակն է, որ կառուցվել է ԼՂԻՄ-ի ներսում, քանի որ աշխարհագրորեն անհնարին էր այդ հանգույցը ԼՂԻՄ-ի սամաններից դուրս ստեղծել: Բայց կառուցվելով այդ հատվածում` մենք միևնույն է զրկված ենք եղել այդ ջրային ռեսուրսներից օգտվելու հնարավորությունից:
Սարսանգը խորհրդային տարիներին ոռոգում էր մոտ 128 հազար հեկտար տարածք, որից Արցախում միայն 10-12 հազարն էր, պատկերացնո՞ւմ եք` ինչ իրավիճակ էր տիրում: Ավելին` նրանք թունավորում էին մեր գետերը, դրա համար ԼՂԻՄ-ը, որն առաջին տեղն էր զբաղեցնում աշխարհում երկարակյացների թվով, արդեն 1970-1989 թթ. Անդրկովկասում երկրորդն տեղն էր զբաղեցնում քաղցկեղով հիվանդների քանակով` զիջելով միայն Սումգայիթին: Սա միտումնավոր քաղաքականություն էր Ադրբեջանի իշխանությունների կողմից, որոնք, վերահսկելով ջրային աղբյուրները, թունավորում էին դրանք, քլորն էին չարաշահում: Այս ֆաշիստական քաղաքականությունը շարունակվում է առ այսօր»:
Եվրոպայի խորհրդի խորհրդարանական վեհաժողովի Սոցիալական, առողջապահության և կայուն զարգացման հանձնաժողովի նիստի օրակարգում ընդգրկվել է Լեռնային Ղարաբաղի Սարսանգի ջրամբարի վերաբերյալ զեկույցի նախագիծ: ԵԽԽՎ հանձնաժողովն ընդունել է Բոսնիա և Հերցեգովինան ներկայացնող պատգամավոր Միլիցա Մարկովիչի` խիստ կողմնակալ և քաղաքական բառապաշարով գրված զեկույցը: Զեկույցը կրում է «Ադրբեջանի սահմանամերձ շրջանների բնակիչները միտումնավոր զրկված են ջրից» խորագիրը:
